വിജയ് യുടെ പ്രചാരണത്തിന് ഇനി റോഡ് ഷോയില്ല, എത്തുക ഹെലികോപ്ടറില്‍

ചെന്നൈ: കരൂരില്‍ റോഡ് ഷോയ്ക്കിടെ തിക്കിലും തിരക്കിലും പെട്ട് 41 പേര്‍ മരിച്ച പശ്ചാത്തലത്തില്‍ റോഡ് ഷോകള്‍ ഒഴിവാക്കാന്‍ തീരുമാനിച്ച് നടന്‍ വിജയ്. തമിഴക വെട്രി കഴകത്തിന്റെ പ്രചരണത്തിന് ഹെലികോപ്ടറിലായിരിക്കും ഇനിമുതല്‍ വിജയ് എത്തുക. പാര്‍ട്ടി പ്രചാരണത്തിനു ഹെലികോപ്റ്റര്‍ വാങ്ങാന്‍ തമിഴക വെട്രി കഴകം(ടിവികെ)അധ്യക്ഷന്‍ വിജയ് നീക്കം തുടങ്ങി. ബെംഗളൂരു ആസ്ഥാനമായ കമ്പനിയില്‍ നിന്നു നാലു ഹെലികോപ്റ്ററുകളാണ് വാങ്ങുന്നത്. സമ്മേളന വേദിക്കരികില്‍ ഹെലിപാഡ് തയ്യാറാക്കി അവിടേക്കാവും വിജയ് ഹെലികോപ്ടറില്‍ വരിക. സമ്മേളനം ആരംഭിക്കുന്നതിന് 15 മിനിറ്റ് മുന്‍പു മാത്രമായിരിക്കും വിജയ് എത്തുക.

സെപ്റ്റംബര്‍ 27ന് കരൂരില്‍ നടന്ന ടിവികെയുടെ റോഡ് ഷോക്കിടെ തിക്കിലും തിരക്കിലും പെട്ട് 41 പേര്‍ മരിച്ചിരുന്നു. ഇതിനു പിന്നാലെയാണ് റോഡ് ഷോ ഒഴിവാക്കാന്‍ വിജയും പാര്‍ട്ടിയും തീരുമാനമെടുത്തിരിക്കുന്നത്. റോഡ് ഷോ മാറ്റി ഹെലികോപ്ടറില്‍ എത്തുന്നതോടെ ജനങ്ങളില്‍ നിന്ന് അകന്നേക്കും എന്ന ആശങ്ക പാര്‍ട്ടി നേതൃത്വത്തിലെ ചിലര്‍ക്ക് ഉണ്ടായിരുന്നു. എന്നാല്‍, മുന്‍ മുഖ്യമന്ത്രി ജയലളിത ഉള്‍പ്പടെയുള്ളവര്‍ പ്രചാരണത്തിന് ഹെലികോപ്ടര്‍ ഉപയോഗിച്ചിരുന്നു. റോഡ് ഷോ ഒഴിവാക്കിയാല്‍ ജനകീയത കുറയുമെന്നത് ശരിയല്ലെന്നാണ് പാര്‍ട്ടി നിഗമനം.