നാസിക് ടിസിഎസ് കേസ്; ആസൂത്രിതമായ വിദ്വേഷ പ്രചാരണം അപലപനീയം: എസ്ഡിപിഐ

ന്യൂഡല്‍ഹി: നാസിക് ടിസിഎസ് ബിപിഒ യൂണിറ്റില്‍ ലൈംഗിക പീഡനവും മതപരമായ നിര്‍ബന്ധിത മതപരിവര്‍ത്തനവും ആരോപിച്ചുകൊണ്ടുള്ള ആസൂത്രിത കേസിനെയും വിദ്വേഷ പ്രചാരണത്തെയും എസ്ഡിപിഐ ദേശീയ ജനറല്‍ സെക്രട്ടറി യാസ്മിന്‍ ഫാറൂഖി ശക്തമായി അപലപിച്ചു. നിരപരാധികളായ മുസ് ലിം യുവാക്കളെ അപകീര്‍ത്തിപ്പെടുത്തുന്നതിനും, ജോലിസ്ഥലത്ത് ധ്രുവീകരണം സൃഷ്ടിക്കുന്നതിനും, ന്യൂനപക്ഷങ്ങളെ ലക്ഷ്യമിട്ട് ഉപയോഗിക്കാറുള്ള അപകടകരമായ 'ലൗ ജിഹാദ്' ആഖ്യാനത്തെ പുനരുജ്ജീവിപ്പിക്കുന്നതിനുമുള്ള മുന്‍കൂട്ടി നിശ്ചയിച്ച ഗൂഢാലോചനയാണ് ഇതിന് പിന്നിലെന്ന് അവര്‍ പ്രസ്താവിച്ചു. ഇതിനുപുറമെ, വലതുപക്ഷ ഹിന്ദുത്വ സോഷ്യല്‍ മീഡിയ ഹാന്‍ഡിലുകള്‍ 'കോര്‍പ്പറേറ്റ് ജിഹാദ്' എന്ന സിദ്ധാന്തം ആക്രമണാത്മകമായി പ്രചരിപ്പിക്കുകയും, ഡിജിറ്റല്‍ പ്ലാറ്റ്‌ഫോമുകളിലൂടെയും ടെലിവിഷന്‍ സംവാദങ്ങളിലൂടെയും തെറ്റായ വിവരങ്ങളും വര്‍ഗീയ വിദ്വേഷവും പടര്‍ത്തി മുസ് ലിം സമുദായത്തെ ഭീഷണിപ്പെടുത്താന്‍ ശ്രമിക്കുകയുമാണെന്ന് അവര്‍ നിരീക്ഷിച്ചു.

ബജ്‌റംഗ് ദളിന്റെ ഇടപെടലിലൂടെ ഒരു വ്യക്തിപരമായ വിഷയത്തെ എങ്ങനെയാണ് വലിയൊരു വിവാദമാക്കി മാറ്റിയതെന്ന് പ്രതികളുടെ കുടുംബങ്ങള്‍ വെളിപ്പെടുത്തിയതായി ഫാറൂഖി പറഞ്ഞു. സാധാരണ ജോലിസ്ഥലത്തെ പ്രശ്നങ്ങളെ വക്രീകരിക്കുകയും, നിര്‍ബന്ധിത മതപരിവര്‍ത്തനത്തെക്കുറിച്ചുള്ള അതിശയോക്തി കലര്‍ന്ന അവകാശവാദങ്ങളും അടിസ്ഥാനരഹിതമായ ആരോപണങ്ങളും കെട്ടിച്ചമയ്ക്കുകയുമാണ് ചെയ്തത്. നിദാ ഖാനെ ഒരു സൂത്രധാരയായും സീനിയര്‍ എച്ച്ആര്‍ ഉദ്യോഗസ്ഥയായും ചിത്രീകരിക്കുന്നത് തികച്ചും തെറ്റാണെന്ന് അവര്‍ വ്യക്തമാക്കി. നിദാ ഖാന്‍ എച്ച്ആര്‍ മാനേജരോ റിക്രൂട്ട്‌മെന്റില്‍ ഏര്‍പ്പെട്ടിരിക്കുന്ന വ്യക്തിയോ അല്ലെന്നും, ഒരു പ്രോസസ് അസോസിയേറ്റായി ജോലി ചെയ്യുന്നയാളാണെന്നും ടിസിഎസ് സ്ഥിരീകരിച്ചിട്ടുണ്ട്. ഗര്‍ഭിണിയായ അവര്‍ നിലവില്‍ മുംബൈയിലെ ഭര്‍ത്താവിന്റെ വീട്ടിലാണെന്നും, ഒളിവില്‍ പോയിട്ടില്ലെന്നും അന്വേഷണവുമായി സഹകരിക്കാന്‍ തയ്യാറാണെന്നും കുടുംബം അറിയിച്ചിട്ടുണ്ട്.

40 ദിവസത്തെ രഹസ്യ ഓപ്പറേഷന്‍, അറസ്റ്റുകള്‍, ഒന്നിലധികം ഏജന്‍സികളുടെ പെട്ടെന്നുള്ള ഇടപെടല്‍ എന്നിവയില്‍ ആശങ്ക പ്രകടിപ്പിച്ച ഫാറൂഖി, ഈ സംഭവവികാസങ്ങള്‍ പക്ഷപാതത്തെക്കുറിച്ചും ഗൂഢലക്ഷ്യങ്ങളെക്കുറിച്ചും ഗുരുതരമായ ചോദ്യങ്ങള്‍ ഉയര്‍ത്തുന്നതായി പറഞ്ഞു. ടിസിഎസിന്റെ സ്ത്രീകള്‍ക്കെതിരായ ലൈംഗീകാതിക്രമങ്ങള്‍ തടയുന്നതിനുള്ള ആഭ്യന്തര സംവിധാനം (POSH), എത്തിക്സ് സംവിധാനങ്ങളില്‍ ഇത്തരത്തിലുള്ള പരാതികളൊന്നും രേഖപ്പെടുത്തിയിട്ടില്ലെന്ന കമ്പനിയുടെ പ്രസ്താവന എഫ്‌ഐആറുകള്‍ക്ക് പിന്നിലെ സമയത്തെയും ഉദ്ദേശ്യത്തെയും സംശയത്തിലാക്കുന്നു. അസോസിയേഷന്‍ ഫോര്‍ പ്രൊട്ടക്ഷന്‍ ഓഫ് സിവില്‍ റൈറ്റ്‌സ് (APCR) നാസിക്കില്‍ നടത്തിയ വസ്തുതാന്വേഷണ റിപ്പോര്‍ട്ട് ചൂണ്ടിക്കാട്ടി, മാധ്യമങ്ങള്‍ പ്രചരിപ്പിക്കുന്ന കഥകളില്‍ നിന്ന് വ്യത്യസ്തമായി ഇതൊരു സാധാരണ നിയമതര്‍ക്കം മാത്രമാണെന്ന് അവര്‍ പറഞ്ഞു. വര്‍ഗീയ മുന്‍വിധികളില്ലാത്ത നിഷ്പക്ഷമായ അന്വേഷണം വേണമെന്നും, അറസ്റ്റ് ചെയ്ത ജീവനക്കാരെ വിട്ടയക്കണമെന്നും, വിദ്വേഷവും വ്യാജവാര്‍ത്തകളും പ്രചരിപ്പിക്കുന്നവര്‍ക്കെതിരെ കര്‍ശന നടപടി സ്വീകരിക്കണമെന്നും ഫാറൂഖി ആവശ്യപ്പെട്ടു. ഇത്തരത്തിലുള്ള ഭിന്നിപ്പുണ്ടാക്കുന്ന പ്രചാരണങ്ങളെ തള്ളിക്കളയാന്‍ എല്ലാ മതേതര ശക്തികളോടും അവര്‍ അഭ്യര്‍ത്ഥിച്ചു.