ജാലിയൻ വാലാബാ​ഗ് ദിനത്തിൽ കർഷകർ പ്രതിഷേധിച്ചു

അമൃത്സർ: ജാലിയൻ വാലാബാ​ഗ് ദിനത്തിൽ മൂന്ന് കേന്ദ്ര കാർഷിക നിയമങ്ങൾക്കെതിരേ കർഷകർ അമൃത്സറിലെ ജന്ദ്യാല ഗുരു ദാന മണ്ഡിയിൽ ചൊവ്വാഴ്ച പ്രതിഷേധ പ്രകടനം സംഘടിപ്പിച്ചു.

ജാലിയൻ വാലാബാഗ് കൂട്ടക്കൊലയുടെ 102-ാം വാർഷികത്തോടനുബന്ധിച്ച് കൊല്ലപ്പെട്ടവർക്ക് ആദരാഞ്ജലി അർപ്പിക്കാൻ അവർ ഒരു നിമിഷം നിശബ്ദത പാലിച്ചു. കാർഷിക നിയമങ്ങൾ റദ്ദാക്കണമെന്ന് ആവശ്യപ്പെട്ട് വനിതാ പ്രതിഷേധക്കാർ സർക്കാർ വിരുദ്ധ മുദ്രാവാക്യം മുഴക്കി.

ജാലിയൻ വാല ബാഗ് കൂട്ടക്കൊലയിൽ ജീവൻ നഷ്ടപ്പെട്ടവർക്ക് ഞങ്ങൾ ആദരാഞ്ജലി അർപ്പിച്ചു. കേന്ദ്ര കാർഷിക നിയമങ്ങൾക്കെതിരേ ഹിന്ദു, സിഖ്, മുസ്ലിം, ക്രിസ്ത്യാനികൾ ഐക്യപ്പെടണമെന്ന് അഭ്യർത്ഥിക്കുന്നുവെന്ന് പ്രക്ഷോഭകർ പറഞ്ഞു.

സിങ്കു, തിക്രി, ഖാസിപൂർ അതിർത്തികളിൽ ലക്ഷക്കണക്കിന് കർഷകർ ഇപ്പോഴും പ്രക്ഷോഭത്തിലാണ്. മൂന്ന് കാർഷിക നിയമങ്ങളും റദ്ദാക്കാന്നതുവരെ അവർ പ്രക്ഷോഭം തുടരും. ഏപ്രിൽ 20 ന് ഗുരുദാസ്പൂരിൽ നിന്ന് ആയിരക്കണക്കിന് ട്രാക്ടറുകൾ ഡൽഹിയിലേക്ക് മാർച്ച് ചെയ്യും.