വില ഇടിഞ്ഞ് തക്കാളി ; കർഷകർ ദുരിതത്തിൽ, കന്നുകാലികൾക്ക് തീറ്റയായി വിളവ്

ബംഗളൂരു: വിപണിയിൽ തക്കാളിക്ക് ആവശ്യക്കാർ കുറയുന്നതോടെ കർണാടകയിലെ ഹൊസാപേട്ടയിൽ കർഷകർ കടുത്ത പ്രതിസന്ധിയിൽ. എൽപിജി ക്ഷാമത്തെ തുടർന്ന് ഹോട്ടൽ-റസ്റ്റോറന്റ് മേഖലയിൽ പ്രവർത്തനം കുറഞ്ഞത് തക്കാളി ആവശ്യകതയെ ഗണ്യമായി ബാധിച്ചു. ഇതോടെ പ്രാദേശിക വിപണികളിൽ വില കുത്തനെ ഇടിഞ്ഞു.
വിജയനഗര ജില്ലയിലെ ഹൊസാപേട്ട എപിഎംസി മാർക്കറ്റിൽ എത്തുന്ന ടൺ കണക്കിന് തക്കാളി വാങ്ങാനാരുമില്ലാതെ കെട്ടിക്കിടക്കുന്ന സ്ഥിതിയാണ്. വിളവുകൾ നശിപ്പിക്കേണ്ടിവരുന്നതിനെക്കാൾ, കന്നുകാലികൾക്ക് തീറ്റയായി നൽകാനാണ് കർഷകർ നിർബന്ധിതരാകുന്നത്.

ഹാരപ്പനഹള്ളി, ഹഡഗലി, കോട്ടൂർ തുടങ്ങിയ മേഖലകളിൽ നിന്ന് ദിവസേന ട്രാക്ടർ ലോഡുകളായി തക്കാളി വിപണിയിലെത്തുന്നുവെങ്കിലും ആവശ്യക്കാരില്ലായ്മ കർഷകരുടെ ദുരിതം വർധിപ്പിക്കുകയാണ്.