നാരദ കേസിൽ 4 തൃണമൂൽ നേതാക്കൾക്ക് കൊൽക്കത്ത ഹൈക്കോടതി ഇടക്കാല ജാമ്യം അനുവദിച്ചു

കൊൽക്കത്ത: നാരദ കേസിൽ നാല് തൃണമൂൽ നേതാക്കൾക്ക് കൊൽക്കത്ത ഹൈക്കോടതി ഇടക്കാല ജാമ്യം അനുവദിച്ചു. തൃണമൂൽ കോൺഗ്രസ് (ടിഎംസി) നേതാക്കളായ ഫിർഹാദ് ഹക്കീം, സുബ്രത മുഖർജി, എം‌എൽ‌എ മദൻ മിത്ര, കൊൽക്കത്ത മുൻ മേയർ സോവൻ ചാറ്റർജി എന്നിവർക്കാണ് കൊൽക്കത്ത ഹൈക്കോടതി ഇടക്കാല ജാമ്യം അനുവദിച്ചത്.

രണ്ട് ലക്ഷം രൂപയുടെ വ്യക്തിഗത ബോണ്ടും രണ്ട് പേരുടെ ആൾ ജാമ്യവും സമർപ്പിക്കണമെന്ന വ്യവസ്ഥയിലാണ് ജാമ്യം ലഭിച്ചത്. ഈ വിഷയത്തിൽ അന്വേഷണം അവസാനിക്കുന്നതുവരെ, നാരദ കേസിൽ വിചാരണ തീർപ്പാക്കാത്തതിനെ കുറിച്ച് കുറ്റാരോപിതർ മാധ്യമങ്ങൾക്ക് അഭിമുഖങ്ങൾ നൽകരുതെന്നും കോടതി നിർദേശിച്ചു.

കൊൽക്കത്ത ഹൈക്കോടതിയുടെ ഉത്തരവിനെ ചോദ്യം ചെയ്ത് മെയ് 24 ന് സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ സുപ്രിംകോടതിയിൽ പ്രത്യേക ഹരജി നൽകിയിരുന്നു. പ്രതികളായ നാല് തൃണമൂൽ കോൺഗ്രസ് നേതാക്കളെ വീട്ടുതടങ്കലിൽ പാർപ്പിക്കാൻ നേരത്തെ കോടതി അനുവദിച്ചിരുന്നു. നാരദ സ്റ്റിങ് ഓപ്പറേഷൻ എന്നറിയപ്പെടുന്ന ഒരു സ്റ്റിങ് ഓപ്പറേഷനുമായി ബന്ധപ്പെട്ടതാണ് കേസ്.