ഹാര്‍ദിക് പട്ടേലിനെ ബിജെപി തുടര്‍ച്ചയായി ഉപദ്രവിക്കുന്നു: പ്രിയങ്കാ ഗാന്ധി

ന്യൂഡല്‍ഹി: ബിജെപി തുടര്‍ച്ചയായി ഹാര്‍ദിക് പട്ടേലിനെ ഉപദ്രവിക്കുകയാണെന്ന് കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി. പട്ടേല്‍ യുവാക്കള്‍ക്ക് തൊഴിലിനും കര്‍ഷകരുടെ അവകാശത്തിനുമായി പോരാടുന്നതിനാലാണ് ബിജെപി ഉപദ്രവിക്കുന്നതെന്നും പ്രിയങ്ക ട്വിറ്ററിലൂടെ പ്രതികരിച്ചു.

ഹാര്‍ദിക് തന്റെ സമൂഹത്തിലെ ജനങ്ങളുടെ ആശങ്കകള്‍ പ്രകടിപ്പിച്ചു. സമൂഹത്തിലെ ജനങ്ങള്‍ക്കായി ജോലിയും സ്‌കോളര്‍ഷിപ്പുകളും തേടി. കാര്‍ഷികപോരാട്ടങ്ങള്‍ ഏറ്റെടുക്കുകയും ചെയ്തു. ബിജെപി ഇതിനെ രാജ്യദ്രോഹമെന്ന് വിളിക്കുന്നു പ്രിയങ്ക ട്വീറ്റ് ചെയ്തു.

ഇന്നലെ രാത്രി അഹമ്മദാബാദിലെ വിരാംഗത്തില്‍ നിന്നാണ് ജാമ്യമില്ലാ കുറ്റം ചുമത്തി ഹര്‍ദിക്കിനെ പോലിസ് അറസ്റ്റ് ചെയ്തത്. 2015ല്‍ പട്ടേല്‍ സംവരണ പ്രക്ഷോഭത്തില്‍ ജനങ്ങളെ കലാപത്തിന് പ്രേരിപ്പിച്ചെന്നാണ് ഹാര്‍ദിക്കിനെതിരെയുള്ള കേസ്.