പരിസ്ഥിതി മലിനീകരണ നിയന്ത്രണ ലംഘനങ്ങള്‍ നടത്തി; ബെംഗളൂരു ബിഗ് ബോസ് സ്റ്റുഡിയോ സീല്‍ ചെയ്തു

ബെംഗളൂരു: ജനപ്രിയ റിയാലിറ്റി ഷോയായ ബിഗ് ബോസ് കന്നഡയുടെ സ്റ്റുഡിയോ കര്‍ണാടക സംസ്ഥാന മലിനീകരണ നിയന്ത്രണ ബോര്‍ഡ് (കെഎസ്പിസിബി) സീല്‍ ചെയ്തു. പരിസ്ഥിതി നിയമങ്ങള്‍ ലംഘിച്ചതിന് ബിഗ് ബോസ് കന്നഡ ചിത്രീകരിക്കുന്ന സ്ഥലം അടച്ചുപൂട്ടാന്‍ കര്‍ണാടക സംസ്ഥാന മലിനീകരണ നിയന്ത്രണ ബോര്‍ഡ് (കെഎസ്പിസിബി) കഴിഞ്ഞ ദിവസം നോട്ടീസ് നല്‍കിയിരുന്നു.

ബെംഗളൂരു ബിഡദി ഹോബ്ലിയിലെ ജോളി വുഡ് സ്റ്റുഡിയോസ് ആന്റ് അഡ്വഞ്ചേഴ്സിലെ ബിഗ് ബോസ് സെറ്റിനാണ് നോട്ടീസ് നല്‍കിയത്. തുടര്‍ന്ന് സ്റ്റുഡിയോയുടെ പ്രധാന കവാടം സീല്‍ ചെയ്്തു പൂട്ടുകയായിരുന്നു. ഗുരുതരമായ പരിസ്ഥിതി മലിനീകരണ നിയന്ത്രണ ലംഘനങ്ങള്‍ നടത്തിയെന്ന് ചൂണ്ടിക്കാട്ടിയാണ് കര്‍ണാടക സംസ്ഥാന മലിനീകരണ നിയന്ത്രണ ബോര്‍ഡിന്റെ നടപടി. സ്ഥലത്തെ എല്ലാ പ്രവര്‍ത്തനങ്ങളും ഉടനടി നിര്‍ത്തിവയ്ക്കാന്‍ ഉത്തരവില്‍ നിര്‍ദേശിച്ചിട്ടുണ്ട്.

1974ലെ ജല മലിനീകരണ നിയന്ത്രണ നിയമവും 1981ലെ വായു മലിനീകരണ നിയന്ത്രണ നിയമവും പ്രകാരമുള്ള സമ്മതവും മറ്റും നേടാതെ വലിയ തോതിലുള്ള വിനോദ, സ്റ്റുഡിയോ പ്രവര്‍ത്തനങ്ങള്‍ക്കായി പരിസരം ഉപയോഗിക്കുന്നുവെന്ന് ബോര്‍ഡ് പറയുന്നു. മലിനജലം പുറത്തേക്ക് ഒഴുക്കിവിടുന്നതടക്കം കെഎസ്പിസിബി ചൂണ്ടിക്കാട്ടുന്നുണ്ട്.

അടച്ചുപൂട്ടല്‍ ഉത്തരവിന്റെ പകര്‍പ്പുകള്‍ രാമനഗര ജില്ല ഡെപ്യൂട്ടി കമ്മീഷണര്‍, ബെസ്‌കോം മാനേജിംഗ് ഡയറക്ടര്‍, രാമനഗര താലൂക്കിലെ എക്‌സിക്യൂട്ടീവ് എഞ്ചിനീയര്‍, അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ (ഇലക്ട്രിക്കല്‍) എന്നിവര്‍ക്ക് അയച്ചിട്ടുണ്ട്. നടന്‍ കിച്ച സുദീപ് അവതാരകനായ ബിഗ് ബോസ് കന്നഡ പതിപ്പ് വര്‍ഷങ്ങളായി ബിഡദിയില്‍ പ്രത്യേകം നിര്‍മ്മിച്ച ഒരു സെറ്റിലാണ് ചിത്രീകരിച്ചത്.