ജാര്‍ഖണ്ഡില്‍ പാളം മുറിച്ചുകടക്കവെ ഗുഡ്‌സ് ട്രെയിനിടിച്ച് 80 ആടുകള്‍ ചത്തു

റാഞ്ചി: ജാര്‍ഖണ്ഡിലെ പാലമു ജില്ലയിലെ കോഷ്യാര ഗ്രാമത്തിന് സമീപം ഗുഡ്‌സ് ട്രെയിന്‍ ഇടിച്ച് 80 ആടുകള്‍ ചത്തു. കോഷ്യാരയ്ക്കടുത്തുള്ള റെയില്‍വേ പാളം മുറിച്ചുകടക്കുന്നതിനിടെയാണ് ആടുകളെ ട്രെയിന്‍ ഇടിച്ചത്. ട്രെയിന്‍ അടുത്തെത്തിയപ്പോള്‍ ആട്ടിന്‍കൂട്ടം പരിഭ്രാന്തരായി ഓടുകയായിരുന്നു.

ആടുകളെ നിയന്ത്രിക്കാന്‍ മേച്ചില്‍ക്കാരന്‍ ശ്രമിച്ചെങ്കിലും നടന്നില്ല. അങ്ങനെ അവയില്‍ വലിയൊരു ഭാഗം ചക്രത്തിനടിയില്‍ കയറിയതായി പോലിസ് പറഞ്ഞു. ഹുസൈനാബാദിലെ സബ് ഡിവിഷനല്‍ പോലിസ് ഓഫിസര്‍ പൂജ്യ പ്രകാശ് സംഭവം സ്ഥിരീകരിക്കുകയും ചത്ത ആടുകളെ നീക്കം ചെയ്യുന്നതിനുള്ള പ്രവര്‍ത്തനങ്ങള്‍ ആരംഭിക്കുകയും ചെയ്തു. മേച്ചില്‍ക്കാര്‍ ശേഷിക്കുന്ന ആട്ടിന്‍കൂട്ടവുമായി മടങ്ങി. ഇതില്‍ പരിക്കേറ്റ ചില മൃഗങ്ങളും ഉള്‍പ്പെടുന്നു.