വടകര സ്വദേശിനി കൊവിഡ് ബാധിച്ചു മരിച്ചു

വടകര: പതിയാരക്കര മൂലത്ത് നട പാലത്തിന് സമീപം ഒതയോത്ത് ചന്ദ്രി (72) കൊവിഡ് ബാധിച്ചു മരിച്ചു. ശാരീരിക അവശതകളെ തുടർന്ന് ചൊവ്വാഴ്ച രാത്രിയോടെയാണ് കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്. ബുധനാഴ്ച പുലർച്ചെ ഒന്നരയോടെ മരിച്ചു. തുടർന്ന് നടന്ന കൊവിഡ് പരിശോധനയിലാണ് പോസിറ്റീവാണെന്ന് സ്ഥിരീകരിച്ചത്.

ചന്ദ്രിയുടെ മകൻ രാജീവൻ ജോലി ആവശ്യാർഥം ചോറോട് പോയിരുന്നു. അവിടെ കൊവിഡ് രോഗിയുമായി സമ്പർക്കത്തിലായതിനെ തുടർന്ന് കൊവിഡ് പരിശോധനക്ക് വിധേയനായിട്ടുണ്ട്. രാജീവൻ്റെ കൊവിഡ് ടെസ്റ്റ് ഫലം ലഭിച്ചിട്ടില്ല. ശാരീരിക അവശതകളുള്ള അമ്മ ചന്ദ്രിക്ക് മകൻ്റെ സമ്പർക്കത്തിലൂടെയാണ് രോഗബാധയുണ്ടായതെന്നാണ് നിഗമനം.

അവശതകളെ തുടർന്ന് ചന്ദ്രിയെ വടകര സഹകരണ ആശുപത്രിയിലും രാത്രിയോടെ മെഡിക്കൽ കോളേജിലും എത്തിക്കുകയായിരുന്നു. പ്രദേശത്ത് ഇവരെ ആശുപത്രിയിൽ എത്തിച്ചവർ ഉൾപ്പെടെ ഏതാനും പേർ ക്വാറൻ്റൈനിലാണുള്ളത്. ഭർത്താവ്: പരേതനായ നാരായണൻ. മരുമകൾ: സുനില.സഹോദരങ്ങൾ: ബാലൻ, നാരായണി, ശ്യാമള, ഗൗരി, പത്മിനി.