വാക്സിന് ചലഞ്ച്: സഹകരണ മേഖല ആദ്യ ഘട്ടത്തില് 200 കോടി നല്കുമെന്ന് മന്ത്രി കടകംപള്ളി സുരേന്ദ്രന്
തിരുവനന്തപുരം: നാട് നേരിടുന്ന കൊവിഡ് പ്രതിസന്ധിയില് നിന്നും കരകയറുന്നതിന് കൊവിഡ് വാക്സിന് ചലഞ്ചിന്റെ ഭാഗമായി സഹകരണ മേഖല ആദ്യ ഘട്ടത്തില് 200 കോടി സമാഹരിച്ചു നല്കുമെന്ന് മന്ത്രി കടകംപള്ളി സുരേന്ദ്രന് അറിയിച്ചു. മന്ത്രിയുടെ നേതൃത്വത്തില് ചേര്ന്ന ഓണ്ലൈന് യോഗത്തിലാണ് ആദ്യഘട്ടത്തില് 200 കോടി സമാഹരിച്ച് മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കാന് തീരുമാനിച്ചത്.
ചലഞ്ചില് പങ്കെടുത്തു പ്രാഥമിക വായ്പാ സംഘങ്ങള് ഗ്രേഡിങ് പ്രകാരം 2 ലക്ഷം മുതല് 10 ലക്ഷം രൂപ വരെ നല്കും. പ്രാഥമിക വായ്പേതര സംഘങ്ങള് 5000 മുതല് 1 ലക്ഷം രൂപ വരെ നല്കും. കേരള ബാങ്ക് 5 കോടിയും സംസ്ഥാന കാര്ഷിക ഗ്രാമ വികസന ബാങ്ക് 2 കോടിയും, ലാഭത്തില് പ്രവര്ത്തിക്കുന്ന സഹകരണ സ്ഥാപനങ്ങള് ഓരോ കോടി വീതവും മറ്റുള്ള സ്ഥാപനങ്ങള് അവയുടെ സാമ്പത്തിക സ്ഥിതിക്കനുസരിച്ചും സംഭാവന നല്കും. 2 ദിവസത്തെ ശമ്പളം സഹകരണ ജീവനക്കാര് സിഎംഡിആര്എഫിലേക്ക് നല്കും. ഒരു ദിവസത്തെ ശമ്പളം ഏപ്രില് മാസത്തിലെ ശമ്പളത്തില് നിന്നും ഒരു ദിവസത്തെ ശമ്പളം മെയ് മാസത്തെ ശമ്പളത്തില് നിന്നുമാണ് നല്കുക. സഹകരണ മേഖലയില് പ്രവര്ത്തിക്കുന്ന ബോര്ഡുകള്, സ്വയം ഭരണ സ്ഥാപനങ്ങള്, മറ്റു സ്ഥാപനങ്ങള് എന്നിവ അവയുടെ സാമ്പത്തിക സ്ഥിതിക്കനുസരിച്ചും ജീവനക്കാര് 2 ദിവസത്തെ ശമ്പളവും സംഭാവന ചെയ്യും.
സഹകരണ ആശുപത്രികള്, ലാബുകള്, ആംബുലന്സുകള്, നീതി മെഡിക്കല് സ്റ്റോറുകള് എന്നിവ കൂടുതല് സേവന സന്നദ്ധമായും കാര്യക്ഷമമായും പ്രവര്ത്തിക്കണമെന്ന് യോഗത്തില് മന്ത്രി നിര്ദ്ദേശം നല്കും. പലവ്യഞ്ജനങ്ങള്, മരുന്ന് എന്നിവയുടെ വാതില്പടി വിതരണം കണ്സ്യൂമര് ഫെഡ് കൂടുതല് വിപുലമാക്കും. മാര്ക്കറ്റിങ് ഫെഡറേഷനും ഇതു പോലുള്ള നടപടികള് സ്വീകരിക്കുമെന്ന് യോഗത്തില് ഉറപ്പ് നല്കി. സംഘങ്ങളുടെ പൊതുനന്മ ഫണ്ട്, വിഭജിക്കാത്ത ലാഭം എന്നിവയില് നിന്നും സംഘം ഭരണ സമിതിയുടെയോ, പൊതുയോഗ തീരുമാന പ്രകാരമോ ഈ നിധിയിലേക്ക് സംഭാവന നല്കാം. പ്രതിസന്ധി ഘട്ടങ്ങളിലെല്ലാം കഴിഞ്ഞ കാലങ്ങളില് സഹകരണ പ്രസ്ഥാനം കേരളത്തോടൊപ്പമുണ്ടായിരുന്നുവെന്നും പ്രതിസന്ധി ഘട്ടത്തിലെ സഹായി എന്ന മുഖ്യമന്ത്രിയുടെ വിശേഷണം അരക്കിട്ടു ഉറപ്പിക്കുന്നതാണ് സഹകരണ മേഖലയുടെ ഈ നടപടി എന്നും മന്ത്രി കടകംപള്ളി സുരേന്ദ്രന് പറഞ്ഞു. വാക്സിന് ചലഞ്ചില് പങ്കെടുത്തു തന്റെ ഒരു മാസത്തെ ശമ്പളം സിഎംഡിആര്എഫിലേക്ക് നല്കും എന്നും മന്ത്രി വ്യക്തമാക്കി.
സഹകരണ വകുപ്പ് സെക്രട്ടറി മിനി ആന്റണി അധ്യക്ഷത വഹിച്ച യോഗത്തില് വി ജോയ് എംഎല്എ, പി അബ്ദുല് ഹമീദ് എംഎല്എ, കോലിയക്കോട് കൃഷ്ണന് നായര് (ചെയര്മാന്, സംസ്ഥാന സഹകരണ യൂനിയന്), ഗോപി കോട്ടമുറിക്കല് (പ്രസിഡണ്ട്, കേരള ബാങ്ക്), സോളമന് അലക്സ് (പ്രസിഡണ്ട്, കേരള സംസ്ഥാന കാര്ഷിക ഗ്രാമ വികസന ബാങ്ക്), എം മെഹബൂബ് (ചെയര്മാന്, കണ്സ്യൂമര്ഫെഡ്), സംഘടനാ നേതാക്കളായ എ രമേഷ്, അനില്, മുഹമ്മദലി, വിബി പദ്മകുമാര് തുടങ്ങിയവരും സംസ്ഥാനത്തെ പ്രമുഖ സഹകാരികളും, സഹകരണ സ്ഥാപനങ്ങളുടെ ഭാരവാഹികളും, വകുപ്പ് ഉന്നത ഉദ്യോഗസ്ഥരും, സഹകരണ ജീവനക്കാരുടെ വിവിധ സംഘടനാ പ്രതിനിധികളും യോഗത്തില് പങ്കെടുത്തു
RELATED STORIES
മഹാരാഷ്ട്രയിൽ സ്വതന്ത്രനായി മത്സരിക്കാൻ പത്രിക നൽകി 'യമരാജൻ'
19 April 2024 10:50 AM GMTജോലിക്കിടയില് കാണാതായ ആലുവ ഹെഡ് പോസ്റ്റ് ഓഫിസ് ജീവനക്കാരനെ...
19 April 2024 10:49 AM GMTകെ കെ ശൈലജക്കെതിരെ സമൂഹമാധ്യമത്തില് അശ്ലീല കമന്റിട്ട...
19 April 2024 10:47 AM GMTകാട്ടുമാടം മനയിൽ നിന്ന് പുരാതന വിഗ്രഹങ്ങളും സ്വര്ണാഭരണങ്ങളും കവര്ന്ന ...
19 April 2024 10:46 AM GMTരാഹുല് ഗാന്ധിക്കെതിരെ പരിഹാസ പരാമര്ശവുമായി മുഖ്യമന്ത്രി പിണറായി...
19 April 2024 10:44 AM GMTകെകെ ശൈലജക്കെതിരെ സൈബര് ആക്രമണം നടന്നിട്ടുണ്ടെങ്കില് അത് തെറ്റാണ്: ...
19 April 2024 10:43 AM GMT