യൂത്ത് കോണ്‍ഗ്രസ് സംസ്ഥാന സെക്രട്ടറി ജഷീര്‍ പള്ളിവയല്‍ നാമ നിര്‍ദേശ പത്രിക പിന്‍വലിച്ചു

കോഴിക്കോട്: വിമതനായി മല്‍സരിക്കാനൊരുങ്ങിയ യൂത്ത് കോണ്‍ഗ്രസ് സംസ്ഥാന സെക്രട്ടറി ജഷീര്‍ പള്ളിവയല്‍ നാമ നിര്‍ദേശ പത്രിക പിന്‍വലിച്ചു. കോണ്‍ഗ്രസ് നേതാക്കായ ടി സിദ്ദിഖ് എംഎല്‍എ, ഡിസിസി പ്രസിഡണ്ട് ടി ജെ ഐസക് എന്നിവരുമായി നടത്തിയ ചര്‍ച്ചയെ തുടര്‍ന്നാണ് പത്രിക പിന്‍വലിച്ചത്. തോമാട്ടുചാല്‍ ജില്ലാ പഞ്ചായത്ത് ഡിവിഷനിലേക്കാണ് പത്രിക നല്‍കിയിരുന്നത്.

മരിക്കുന്നതുവരെ കോണ്‍ഗ്രസുകാരനായി തുടരുമെന്ന് തോമാച്ചുചാലില്‍ സ്ഥാനാര്‍ഥിത്വം നിഷേധിച്ചതിനെതുടര്‍ന്ന് വിമത സ്ഥാനാര്‍ഥിയായി മല്‍സരിക്കനൊരുങ്ങിയ ജഷീര്‍ പള്ളിവയല്‍ പറഞ്ഞിരുന്നു. പാര്‍ട്ടിയിലെ ചില ആളുകള്‍ സ്ഥാനാര്‍ഥിത്വം ഇല്ലാതാക്കാനായി ശ്രമിച്ചു. ജന്മനാട്ടില്‍ മത്സരിക്കാന്‍ യോഗ്യതയില്ലെന്ന് വിലയിരുത്തിയത് വേദനിപ്പിച്ചു. പാര്‍ട്ടി തീരുമാനം മാറ്റുമെന്ന് പ്രതീക്ഷിക്കുന്നുവെന്നും ജഷീര്‍ പള്ളിവയല്‍ പറഞ്ഞിരുന്നു.