യുഎഇയില്‍ ലോകത്തിലെ ഏറ്റവും വലിയ നവീകരണ ഊര്‍ജ പദ്ധതി ആരംഭിച്ചു

ദുബയ്: സൗരോര്‍ജവും ബാറ്ററി സംഭരണവും സംയോജിപ്പിച്ച് 24 മണിക്കൂറും ഊര്‍ജം ഉത്പാദിപ്പിക്കാന്‍ കഴിയുന്ന ലോകത്തിലെ ഏറ്റവും വലിയ നവീകരണ ഊര്‍ജ പദ്ധതി യുഎഇയില്‍ ആരംഭിച്ചു. ഷെയ്ഖ് തിയാബ് ബിന്‍ മുഹമ്മദ് ബിന്‍ സായിദ് അല്‍ നഹ്യാന്‍ പദ്ധതിയുടെ ശിലാസ്ഥാപനച്ചടങ്ങില്‍ പങ്കെടുത്തു.

മസ്ദറും എമിറേറ്റ്‌സ് വാട്ടര്‍ ആന്‍ഡ് ഇലക്ട്രിസിറ്റി കമ്പനിയും ചേര്‍ന്ന് ഏകദേശം 22 ബില്യണ്‍ ദിര്‍ഹം ചെലവിലാണ് പദ്ധതി നടപ്പാക്കുന്നത്. ഇതില്‍ 5.2 ഗിഗാവാട്ട് സൗരോര്‍ജ പ്ലാന്റും 19 ഗിഗാവാട്ട് മണിക്കൂര്‍ ശേഷിയുള്ള ബാറ്ററി സംഭരണ സംവിധാനവും ഉള്‍പ്പെടുന്നു. 2027 ഓടെ പ്രവര്‍ത്തനം ആരംഭിക്കുമ്പോള്‍, വര്‍ഷംതോറും 5.7 ദശലക്ഷം ടണ്‍ കാര്‍ബണ്‍ ഉദ്ഗമനം കുറയുകയും, 10,000ത്തിലധികം തൊഴില്‍ അവസരങ്ങള്‍ സൃഷ്ടിക്കപ്പെടുകയും ചെയ്യും.

''ഇത് നവീകരണ ഊര്‍ജത്തിന്റെ ഭാവിയെ പുനര്‍നിര്‍വചിക്കുന്ന നിര്‍ണായക നീക്കമാണ്,'' എന്ന് മസ്ദര്‍ ചെയര്‍മാനും വ്യവസായ-സാങ്കേതികവിദ്യ മന്ത്രിയുമായ ഡോ. സുല്‍ത്താന്‍ അല്‍ ജാബര്‍ വ്യക്തമാക്കി.