ചെമ്മീന്‍ കഴിച്ച് യുവതിയുടെ മരണം: മെഡിക്കല്‍ റിപ്പോര്‍ട്ട് പുറത്ത്

തൊടുപുഴ: ചെമ്മീന്‍ കറി കഴിച്ച് അലര്‍ജി മൂര്‍ച്ഛിച്ചതിനെ തുടര്‍ന്ന് ചികിത്സയിലിരിക്കെ മരിച്ച യുവതിയുടെ മരണകാരണം ഹൃദയാഘാതമെന്നു മെഡിക്കല്‍ റിപ്പോര്‍ട്ട്. പാലക്കാട് അമ്പലപ്പാറ മേലൂര്‍ നെല്ലിക്കുന്നത്ത് വീട്ടില്‍ ഗോപാലകൃഷ്ണന്‍-നിഷ ദമ്പതികളുടെ മകള്‍ നികിത (20) ഞായറാഴ്ച രാത്രിയാണു മരിച്ചത്.

ചെമ്മീന്‍കറി കഴിച്ചതിനെ തുടര്‍ന്ന് നികിതയ്ക്ക് അലര്‍ജിയുണ്ടായി. ശ്വാസതടസ്സമുണ്ടായതോടെയാണു തൊടുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചത്. ആശുപത്രിയില്‍ പ്രവേശിപ്പിച്ചശേഷം ഹൃദയാഘാതം ഉണ്ടായതോടെയാണു തീവ്രപരിചരണ വിഭാഗത്തിലേക്കു മാറ്റിയതെന്ന് ഡോക്ടര്‍മാര്‍ പറഞ്ഞു.

പോസ്റ്റ്‌മോര്‍ട്ടം റിപ്പോര്‍ട്ട് കിട്ടിയതിനുശേഷം മാത്രമേ മരണകാരണം ഉറപ്പാക്കാന്‍ കഴിയൂവെന്നു തൊടുപുഴ എസ്എച്ച്ഒ എസ്.മഹേഷ് കുമാര്‍ പറഞ്ഞു. നികിതയുടെ സഹോദരന്‍ ജിഷ്ണുവിന്റെ മൊഴിയുടെ അടിസ്ഥാനത്തില്‍ പോലിസ് കേസെടുത്തിട്ടുണ്ട്.