ഭാരത് ബന്ദ്: അജ്മീറില്‍ പൂര്‍ണം

അജ്മീര്‍: എസ്‌സി-എസ്ടി സംവരണത്തിലെ ക്രീമിലെയര്‍, ഉപസംവരണം എന്നിവയ്‌ക്കെതിരായ ഭാരത് ബന്ദ് പൂര്‍ണം. ചിലയിടങ്ങളില്‍ സംഘര്‍ഷമുണ്ടായി. അജിമീര്‍ നഗരത്തിലെ പ്രധാന മാര്‍ക്കറ്റുകളെല്ലാം അടഞ്ഞുകിടന്നു. റോഡുകളില്‍ വാഹനങ്ങള്‍ ഓടിയില്ല. വിദ്യാഭ്യാസ സ്ഥാപനങ്ങള്‍ സ്വമേധയാ അടഞ്ഞുകിടന്നു. അടിയന്തര സേവനങ്ങള്‍ ഒഴികെ എല്ലാ റീട്ടെയില്‍, വന്‍കിട വ്യാപാര സ്ഥാപനങ്ങളും അടച്ചിട്ടു. സബ്ഡിവിഷന്‍ മേഖലയിലും ബന്ദിന്റെ പ്രതീതി ദൃശ്യമായിരുന്നു.

രാജ്യവ്യാപക ബന്ദിനുള്ള ആഹ്വാനത്തില്‍ അജ്മീറും വിട്ടില്ല. ബന്ദിന്റെ വ്യാപകമായ ആഘാതം അജ്മീറിലും ദൃശ്യമായിരുന്നു. ബന്ദിനെ തുടര്‍ന്ന് മതപരമായ ടൂറിസ്റ്റ് നഗരത്തിലും ഭക്തര്‍ക്ക് ഏറെ ബുദ്ധിമുട്ട് അനുഭവപ്പെട്ടു. ബസ് സ്റ്റാന്‍ഡ്, റെയില്‍വേ സ്‌റ്റേഷന്‍ എന്നിവിടങ്ങളില്‍ നിന്ന് ഹോട്ടലിലേക്കും ഗസ്റ്റ് ഹൗസിലേക്കും ഭക്തര്‍ക്ക് കാല്‍നടയായി പോകേണ്ടിവന്നു. ഭക്തര്‍ക്ക് ചായയും ലഘുഭക്ഷണവും പോലും കിട്ടാതായി. വാസ്തവത്തില്‍, ബന്ദ് കാരണം, ചെറിയ കടകളും ഭക്ഷണശാലകളും അടഞ്ഞുകിടന്നു.

സ്‌സിഎസ്ടി സംവരണത്തില്‍ ക്രീമി ലെയര്‍ സമ്പ്രദായം നടപ്പാക്കി സമൂഹത്തെ ഭിന്നിപ്പിക്കുകയാണെന്ന് അജ്മീര്‍ സൗത്തിലെ കോണ്‍ഗ്രസ് സ്ഥാനാര്‍ത്ഥി ദ്രൗപതി കോലി പറഞ്ഞു. എസ്ടിഎസ്‌സി വിഭാഗങ്ങള്‍ക്ക് എതിരായ വിധിയാണ് സുപ്രിംകോടതി പുറപ്പെടുവിച്ചിരിക്കുന്നതെന്ന് മുന്‍ എംഎല്‍എ ഡോ. രാജ്കുമാര്‍ ജയ്പാല്‍ പറഞ്ഞു.