പെരിയാറില്‍ കൂട്ടുകാര്‍ക്കൊപ്പം കുളിക്കാനിറങ്ങിയ വയനാട് സ്വദേശി മുങ്ങി മരിച്ചു

ആലുവ: പെരിയാറില്‍ കൂട്ടുകാര്‍ക്കൊപ്പം കുളിക്കാനിറങ്ങിയ വയനാട് സ്വദേശി മുങ്ങി മരിച്ചു. മാനന്തവാടി വേമം വലിയ കുന്നേല്‍ ബിനു ജേക്കബാണ് (47) മരിച്ചത്. ഇന്ന് വൈകീട്ട് നാലരയോടെ ആലുവ മണപ്പുറം ദേശം കടവില്‍ കൂട്ടുകാര്‍ക്കൊപ്പം കുളിക്കാനിറങ്ങിയപ്പോഴാണ് സംഭവം.

നീന്തുന്നതിനിടയില്‍ ബിനു കുഴഞ്ഞുപോവുകയായിരുന്നു. വിവരമറിഞ്ഞ് ആലുവ അഗ്‌നി രക്ഷാസേന തിരച്ചില്‍ നടത്തിയെങ്കിലും കണ്ടെത്താനായില്ല. തുടര്‍ന്ന് ഉളിയന്നൂര്‍ കുഞ്ഞുണ്ണിക്കര സ്‌കൂബ ടീം അംഗങ്ങളായ നിയാസ് കപ്പൂരി, അസ്‌ലം, നിസാം, ലത്തീഫ് എന്നിവര്‍ തിരച്ചില്‍ നടത്തി. അഞ്ചരയോടെ കടവില്‍ നിന്ന് 30 മീറ്ററിനുള്ളില്‍ നിന്നാണ്് മൃതദേഹം കണ്ടെത്തിയത്. ആലുവ പോലിസ് മേല്‍നടപടികള്‍ സ്വീകരിച്ചു. മൃതദേഹം ആലുവ ജില്ല ആശുപത്രി മോര്‍ച്ചറിയിലേക്ക് മാറ്റി.