അന്നമനട ഗ്രാമപഞ്ചായത്തിന് അഭിമാനമായി വേലുവിന്റെ സത്യസന്ധത

മാള: വഴിയില്‍ നിന്ന് കളഞ്ഞു കിട്ടിയ 25,000 രൂപയും വിലപിടിപ്പുള്ള രേഖകളും ഉടമക്ക് തിരികെ നല്‍കി വേലു അന്നമനട പഞ്ചായത്തിന്റെ അഭിമാനമായി. ബുധനാഴ്ച്ച രാവിലെ ഒരു യാത്രക്കിടയിലാണ് വ്യാപാരിയായ നിസാറിന്റെ പണവും എടിഎം കാര്‍ഡ്, ലൈസെന്‍സ് തുടങ്ങിയ രേഖകള്‍ അടങ്ങിയ ബാഗ് നഷ്ടപ്പെട്ടത്.

രാവിലെ നടക്കാനിറങ്ങിയ വേലുവിന് ബാഗ് വഴിയില്‍നിന്ന് വീണുകിട്ടി. തുടര്‍ന്ന് വേലു നടത്തിയ അന്വേഷണത്തിലാണ് ഉടമയെ കണ്ടുകിട്ടിയത്. സത്യസന്ധതയുടെ മാതൃകയായ വേലുവിനെ അന്നമനടക്കാര്‍ അഭിനന്ദിച്ചു.