ക്ഷേത്ര മോഷ്ടാവ് പിടിയിൽ; അടിച്ചുമാറ്റിയതിൽ സിസി ടിവി കാമറയും

പരപ്പനങ്ങാടി: മോഷണത്തിനിടയിൽ സിസിടിവി കാമറയും അടിച്ചുമാറ്റിയ മോഷ്ടാവ് പോലിസ് പിടിയിലായി. കഴിഞ്ഞ മാർച്ച് 24ന് പുലർച്ചെ നെടുവ ഹരിപുരം ക്ഷേത്രത്തിലെ ക്ഷേത്ര ഭണ്ഡാരം കുത്തിതുറന്ന പ്രതി കൊല്ലംപേരൂർ വയലിൽ പുത്തൻവീട്ടിൽ അൽഅമീൻ (27) ആണ് അറസ്റ്റിലായത്. മോഷണം നടക്കുന്നതിനിടെ ക്ഷേത്രത്തിൽ സ്ഥാപിച്ച സിസി ടിവിയിൽ തന്റെ ദൃശ്യം പകർന്നതോടെ സിസി ടിവി കാമറയും പ്രതി മോഷ്ടിക്കുകയായിരുന്നു. എന്നാൽ ഹാർഡ് ഡിസ്ക്ക് മോഷ്ടിച്ചിരുന്നില്ല. ക്ഷേത്ര പരിസരത്തെ കോണിയെടുത്ത് സിസിടിവി കാമറ പിഴുതെടുക്കുന്നത് വരെയുള്ള ദൃശ്യങ്ങൾ ഹാർഡ് ഡിസ്കിൽ പതിഞ്ഞിരുന്നു. തുടർന്ന് പരപ്പനങ്ങാടി പോലിസ് നടത്തിയ പരിശോധനയിലാണ് അമ്പലപ്പുഴയിൽ നിന്ന് ഇയാൾ പിടിയിലായത്. കൊല്ലം, പയ്യോളി, ഷൊർണൂർ എന്നിവിടങ്ങളിൽ ഇയാൾ മോഷണം നടത്തിയിട്ടുണ്ട്. പരപ്പനങ്ങാടി കോടതിയിൽ ഹാജരാക്കിയ പ്രതിയെ റിമാന്റ് ചെയ്തു.