താനൂര്‍ മോഷണം; സുഡാനി ഹമീദിന്റെ കൂട്ടാളിയെയും പിടികൂടി

താനൂര്‍: താനൂരില്‍ നടന്ന മോഷണത്തിലെ മുഖ്യസൂത്രധാരനും കൂട്ടുപ്രതിയുമായ അങ്ങാടിപുറം കടുങ്ങുപുരം അല്ലൂര്‍ വീട്ടില്‍ ശിഹാബുദീനെ (46) താനൂര്‍ പോലിസ് അറസ്റ്റ് ചെയ്തു. കഴിഞ്ഞ മാസം 24ാം തിയ്യതി താനൂര്‍ ശോഭ പറമ്പിന് സമീപം മുരളീധരന്റെ വീട്ടില്‍ മോഷണം നടത്തിയ സുഡാനി ഹമീദ് എന്ന അബ്ദുല്‍ ഹമീദിന്റെയും പള്ളിക്കല്‍ ബസാര്‍ സ്വദേശി ആശിഖിന്റെയും കൂട്ടുപ്രതിയാണ് പിടിയിലായ ശിഹാബുദീന്‍.

പ്രതികള്‍ മോഷ്ടിക്കുന്ന വസ്തുക്കള്‍ ശിഹാബുദീനാണ് വില്‍പന നടത്തിയിരുന്നത്. കര്‍ണാടകയിലെ മംഗലാപുരത്ത് ഒളിവില്‍ കഴിഞ്ഞിരുന്ന ശിഹാബുദീനും ഹമീദും തീവണ്ടി കയറി കേരളത്തില്‍ എത്തി ആശിക്കിനെ കൂട്ടി മോഷണം നടത്തുകയാണ് പതിവ.് തമിഴ്‌നാട്ടിലെ സേലത്തും ഇവര്‍ക്ക് ഒളിത്താവളമുണ്ട്.

പോലിസിന്റെ നീക്കങ്ങള്‍ മനസ്സിലാക്കിക്കൊണ്ട് മോഷ്ടാക്കള്‍ അവരുടെ താവളങ്ങളും മാറ്റുന്നതുകൊണ്ടാണ് ഇതുവരെ പിടിക്കാന്‍ കഴിയാതിരുന്നത്. ആശിക്കിനെയും സുഡാനി ഹമീദിനെയും ചോദ്യം ചെയ്തതില്‍ നിന്നാണ് കൂട്ടുപ്രതിയെക്കുറിച്ച് വിവരം ലഭിച്ചത്.

മലപ്പുറം ജില്ലാ പോലിസ് മേധാവി സുജിത്ത് ദാസ് ഐപിഎസ്സിന്റെ നിര്‍ദ്ദേശപ്രകാരം താനൂര്‍ ഡിവൈഎസ്പി മൂസ വള്ളിക്കാടന്റെ നേതൃത്വത്തില്‍ പ്രത്യേക അന്വേഷണ സംഘത്തെ രൂപീകരിച്ചാണ് അന്വേഷണം നടത്തിയത്.

ഡിവൈഎസ്പിയുടെ പ്രത്യേക അന്വേഷണ സംഘത്തില്‍ ഇന്‍സ്‌പെക്ടര്‍മാരായ ജീവന്‍ ജോര്‍ജ്, ഹണി കെ ദാസ്, സീനിയര്‍ സിവില്‍ പോലിസ് ഓഫിസര്‍ സലേഷ് കെ, ജിനേഷ്, എം പി സബറുദ്ദീന്‍, ആല്‍ബിന്‍, അഭിമന്യു, വിപിന്‍ എന്നിവരാണ് ഉണ്ടായിരുന്നത്.