കമൽഹാസൻ ചിത്രം 'തഗ്ഗ് ലൈഫ്' കർണാടകയിൽ റിലീസ് ചെയ്യാൻ സുപ്രിംകോടതി നിർദേശം

ചെന്നൈ: കമൽഹാസന്റെ തമിഴ് ചിത്രമായ തഗ്ഗ് ലൈഫ് കർണാടകയിൽ റിലീസ് ചെയ്യാമെന്ന് സുപ്രിംകോടതി. നടൻ നടത്തിയ വിവാദ പരാമർശങ്ങളുടെ പേരിൽ ചിത്രത്തിന്റെ റിലീസ് നിരോധിക്കുമെന്ന് ഭീഷണിപ്പെടുത്തിയ ഗ്രൂപ്പുകളെ വിമർശിച്ച് കേസിൽ കോടതി നോട്ടിസ് അയച്ചു.

ആൾക്കൂട്ട ഭീഷണികൾക്ക് നിയമവാഴ്ചയെ ബന്ദിയാക്കാൻ കഴിയില്ലെന്ന് പറഞ്ഞ കോടതി, തിയേറ്ററുകളിൽ എന്ത് പ്രദർശിപ്പിക്കണമെന്ന് തീരുമാനിക്കാൻ "ഗുണ്ടകളുടെ കൂട്ടങ്ങളെ" അനുവദിക്കാൻ കഴിയില്ലെന്ന് മുന്നറിയിപ്പ് നൽകി.

കർണാടകയിലെ ജനങ്ങൾക്ക് കമലഹാസനോട് വിയോജിക്കാൻ സ്വാതന്ത്ര്യമുണ്ടെന്നും എന്നാൽ മൗലികാവകാശങ്ങൾ സംരക്ഷിക്കപ്പെടണമെന്നും കോടതി കൂട്ടിച്ചേർത്തു.

ചിത്രത്തിന്റെ നിർമ്മാതാവ് സമർപ്പിച്ച ഹരജി കർണാടക ഹൈക്കോടതിയിൽ നിന്ന് സുപ്രിംകോടതി സ്വന്തം കോടതിയിലേക്ക് മാറ്റുകയും സംസ്ഥാന സർക്കാരിനോട് മറുപടി സമർപ്പിക്കാൻ ആവശ്യപ്പെടുകയും ചെയ്തു. പ്രശ്നം പരിഹരിക്കാൻ നടൻ ക്ഷമാപണം നടത്തണമെന്ന നിർദ്ദേശങ്ങളിൽ ഹൈക്കോടതിയുടെ പങ്കിനെ സുപ്രിം കോടതി ചോദ്യം ചെയ്തു .

ഒരു സിനിമയ്ക്ക് സെൻട്രൽ ബോർഡ് ഓഫ് ഫിലിം സർട്ടിഫിക്കേഷൻ (സിബിഎഫ്‌സി) അനുമതി നൽകിക്കഴിഞ്ഞാൽ, അത് റിലീസ് ചെയ്യാൻ അനുവദിക്കണമെന്ന് കോടതി വ്യക്തമാക്കി. "ആളുകൾക്ക് അത് കാണാതിരിക്കാൻ തീരുമാനിക്കാം. എന്നാൽ ഭീഷണിപ്പെടുത്തി ഒരു സിനിമ റിലീസ് ചെയ്യണോ വേണ്ടയോ എന്ന് തീരുമാനിക്കാൻ അനുവദിക്കില്ല," കോടതി വ്യക്തമാക്കി.