കൂട്ട ആത്മഹത്യയെന്ന് സംശയം; വീട്ടിനുള്ളിൽ അഞ്ചുപേരെ മരിച്ച നിലയിൽ കണ്ടെത്തി

കൊച്ചി: കൊച്ചി വടുതലയിൽ വാടകവീടിനുള്ളിൽ അഞ്ചുപേരെ മരിച്ച നിലയിൽ കണ്ടെത്തി. തിരുവനന്തപുരം വിളപ്പിൽശാല കാരോട് സ്വദേശികളായ ശ്രീകുമാരി, മകൾ അശ്വതി, അശ്വതിയുടെ മക്കളായ 14, നാല്, രണ്ട് എന്നീ വയസ്സുള്ള കുട്ടികൾ എന്നിവരാണ് മരിച്ചത്. വടുതല കർഷക റോഡ് ഗ്രീൻ ഗാർഡനിലാണ് സംഭവം.കൂട്ട ആത്മഹത്യയാണെന്നാണ് പോലിസ് നിഗമനം.

കുട്ടിയുടെ ചികിൽസയ്ക്കായി ഏതാനും മാസങ്ങളായി വടുതലയിലെ വീട്ടിൽ വാടകയ്ക്ക് താമസിച്ചു വരികയായിരുന്നു ഇവർ.വീട് തുറക്കാത്ത നിലയിൽ കണ്ടെത്തിയതിനെ തുടർന്ന് നടന്ന പരിശോധനയിലാണ് അഞ്ചുപേരെയും മരിച്ച നിലയിൽ കണ്ടെത്തിയത്.

സ്ത്രീകളെ തൂങ്ങിമരിച്ച നിലയിലും രണ്ട് കുട്ടികളെ കട്ടിലിൽ പുതപ്പിച്ചു കിടത്തിയ നിലയിലും ഒരു കുട്ടിയെ സമീപത്തു മരിച്ച നിലയിലുമാണ് കണ്ടെത്തിയത്. സാമ്പത്തിക ബാധ്യതയാണോ മരണകാരണം എന്ന് വ്യക്തമല്ല. സംഭവത്തിൽ പോലിസ് അന്വേഷണം ആരംഭിച്ചു.