നീതി ആയോഗിനും കാര്യം മനസ്സിലായി; കേന്ദ്ര പരിഷ്‌കാരങ്ങള്‍ സമ്പദ് വ്യവസ്ഥയെ തളര്‍ത്തി

ന്യൂഡല്‍ഹി: രാജ്യത്തിന്റെ നിലവിലെ സാമ്പത്തിക പിന്നോട്ടടിക്ക് കാരണം കേന്ദ്രസര്‍ക്കാരിന്റെ പരിഷ്‌കാരങ്ങളാണെന്ന് നീതി ആയോഗ് സിഇഒ അമിതാബ് കാന്ത്.സാമ്പത്തികമേഖലയില്‍ ഇനിയും സര്‍ക്കാര്‍ ഉണര്‍ന്നു പ്രവര്‍ത്തിച്ചില്ലെങ്കില്‍ ഇന്ത്യന്‍ സാമ്പത്തികരംഗം കൂപ്പുകുത്തുമെന്നും അദ്ദേഹം പറഞ്ഞതായി ദി ഹിന്ദു റിപോര്‍ട്ട് ചെയ്തു. ജിഎസ്ടി (ചരക്കുസേവന നികുതി), ഐബിസി, റിയല്‍ എസ്റ്റേറ്റ് റെഗുലേറ്ററി തുടങ്ങിയ പരിഷ്‌കാരങ്ങളാണ് കേന്ദ്രം വരുത്തിയത്. ഇതൊക്കെയാണ് സാമ്പത്തികവ്യവസ്ഥയെ തളര്‍ത്തിയത് അദ്ദേഹം പറഞ്ഞത്. എണ്ണ, ഗ്യാസ്, ഖനനം, കല്‍ക്കരി മേഖലകളിലായിരിക്കും ഇനി സര്‍ക്കാര്‍ പരിഷ്‌കാരം നടപ്പിലാക്കുക.

ഇപ്പോഴുള്ള പ്രതിസന്ധിയെ മറികടക്കാന്‍ ധനകാര്യ സ്ഥാപനങ്ങള്‍ക്ക് പണലഭ്യത ഉറപ്പാക്കണം.സ്വകാര്യ മേഖലയെ തളര്‍ത്തുന്ന നടപടികള്‍ സര്‍ക്കാര്‍ സ്വീകരിക്കരുത്. അവരെ തഴഞ്ഞുള്ള സാമ്പത്തിക ഉന്നമനം സാധ്യമല്ലെന്നും അദ്ദേഹം പറഞ്ഞു. കൂടാതെ സ്വകാര്യ മേഖലയിലെ പ്രശ്‌നങ്ങള്‍ പരിഹരിക്കുകയും പല മേഖലകളിലും ഘടനാപരമായ മാറ്റം കൊണ്ടു വരികയും ചെയ്യണമെന്നും അദ്ദേഹം പറഞ്ഞു.

ഗ്യാസ് ഗ്രിഡ്‌സ്, പൈപ്പ്‌ലൈന്‍, ട്രാന്‍സ്മിഷന്‍ ലൈനുകള്‍ എന്നിവ സ്വകാര്യ ഉടമസ്ഥതയില്‍ തുടങ്ങുന്നതാണ് നല്ലത്. കൂടുതല്‍ പൊതുമേഖല സ്ഥാപനങ്ങള്‍ സ്വകാര്യവല്‍ക്കരിക്കണമെന്നും അദ്ദേഹം ആവശ്യപ്പെട്ടു.