റീ ടാറിങ്: വരാപ്പുഴ പാലം ഞായറാഴ്ച രാത്രി അടയ്ക്കും

എറണാകുളം: പറവൂര്‍ എറണാകുളം റൂട്ടിലുള്ള വരാപ്പുഴ പാലം ഞായറാഴ്ച രാത്രി 9 മണി മുതല്‍ അടച്ചിടും. റീടാറിങ് നടക്കുന്ന സാഹചര്യത്തിലാണ് നടപടി.

ഇരുചക്രവാഹനങ്ങള്‍ക്കടക്കം പ്രവേശനമില്ല. അതേസമയം അത്യാഹിത വാഹനങ്ങളും ആംബുലന്‍സുകളും കടത്തിവിടും.

റീ ടാറിങ് കഴിഞ്ഞശേഷം മാത്രമേ റോഡ് തുറന്നുകൊടുക്കുകയുള്ളുവെന്ന് എന്‍എച്ച് ഹൈവേ അസി. എക്‌സിക്യൂട്ടിവ് എഞ്ചിനീയര്‍ പറഞ്ഞു.

പണി നടക്കുന്ന സമയത്ത് ഇടപ്പിള്ളി/കണ്ടെയിനര്‍ റോഡു വഴി പറവൂര്‍ ഭാഗത്തേക്ക് വരുന്ന എല്ലാ വാഹനങ്ങളും ചേരാനെല്ലൂര്‍ സിഗ്നല്‍ കവലയില്‍ നിന്ന് കിഴക്കോട്ട്‌പോയി പഴയ ആനവാതില്‍ കവല/പാതാളം/മുപ്പത്തടം/യുസി കോളജ് വഴി പറവൂര്‍ വന്ന് തിരിഞ്ഞുപോകണം.

പറവൂരില്‍ നിന്ന് വരാപ്പുഴ പാലം വഴി എറണാകുളത്തേക്ക് പോകേണ്ടവര്‍ കൂനമ്മാവ് കവലയില്‍ നിന്ന് ഇടത്തേക്ക് തിരിഞ്ഞ് പാനായിക്കുളം/എടയാര്‍/പാതാളം/ പഴയ ആനവാതില്‍ കവല വഴി കണ്ടെയിനര്‍ റോഡില്‍ വന്ന് തിരിഞ്ഞുപോകണം.