ഓപറേഷൻ സിന്ദൂർ: ട്രംപിൻ്റെ അവകാശവാദത്തിന് മോദി സർക്കാർ മറുപടി പറയണം: സൽമാൻ ഖുർഷിദ്

ന്യൂഡൽഹി: ഓപ്പറേഷൻ സിന്ദൂരിനെ തുടർന്ന് ഇന്ത്യയും പാകിസ്താനും തമ്മിലുള്ള വെടിനിർത്തലിന് മധ്യസ്ഥത വഹിച്ചുവെന്ന യുഎസ് പ്രസിഡന്റ് ഡോണൾഡ് ട്രംപിന്റെ അവകാശവാദങ്ങൾക്ക് നരേന്ദ്ര മോദി സർക്കാർ മറുപടി നൽകേണ്ടതായിരുന്നുവെന്ന് മുതിർന്ന കോൺഗ്രസ് നേതാവും മുൻ വിദേശകാര്യ മന്ത്രിയുമായ സൽമാൻ ഖുർഷിദ്.

" ഡോണൾഡ് ട്രംപ് എന്തുകൊണ്ടാണ് അദ്ദേഹം ആവർത്തിച്ച് ഇത്തരം പ്രസ്താവനകൾ നടത്തുന്നതെന്ന് ഞങ്ങളുടെ പാർട്ടി ചോദിച്ചു. പ്രധാനമന്ത്രി ഈ വിഷയത്തിൽ പ്രതികരിക്കണമായിരുന്നു," ഖുർഷിദ് മാധ്യമപ്രവർത്തകരോട് സംസാരിക്കവെ പറഞ്ഞു.

"ഒരു പ്രധാന വ്യക്തി എന്തെങ്കിലും പറയുമ്പോൾ, എന്താണ് ശരി, എന്താണ് തെറ്റ് എന്ന് നമുക്ക് അറിയാൻ ചോദ്യങ്ങൾ ചോദിക്കേണ്ടത് അത്യാവശ്യമാണ് - വെടിനിർത്തൽ എങ്ങനെ സംഭവിച്ചു, ആരാണ് അതിന് സഹായിച്ചത്. അതുകൊണ്ടാണ് കോൺഗ്രസ് പാർലമെന്റിന്റെ പ്രത്യേക സമ്മേളനം ആവശ്യപ്പെട്ടത്. സർക്കാർ ഇതിന് ഉത്തരം നൽകണമായിരുന്നു," അദ്ദേഹം കൂട്ടിച്ചേർത്തു.

"വിദേശകാര്യങ്ങളുമായി ബന്ധപ്പെട്ട് ഞങ്ങളുടെ പാർട്ടിക്ക് ചില ചോദ്യങ്ങളുണ്ട്. ഈ വിഷയങ്ങൾ ചർച്ച ചെയ്യാൻ പാർലമെന്റിന്റെ പ്രത്യേക സമ്മേളനം വിളിച്ചുചേർക്കണമെന്ന് ഞങ്ങൾ ആഗ്രഹിച്ചു. സർക്കാർ ഈ ആശങ്കകൾ പരിഹരിക്കണമായിരുന്നു.ഇന്ത്യയുടെ നിലപാടിനൊപ്പം നിൽക്കേണ്ടത് നമ്മുടെ കടമയാണ്. എല്ലാവരും രാജ്യത്തോടൊപ്പം നിൽക്കണം" അദ്ദേഹം വ്യക്തമാക്കി.