പൗരത്വ അപേക്ഷ ക്ഷണിക്കല്‍: എസ്ഡിപിഐ വീടുകളില്‍ പ്രതിഷേധം സംഘടിപ്പിച്ചു

തിരൂര്‍: മതം നോക്കി പൗരത്വത്തിനുള്ള അപേക്ഷകള്‍ ക്ഷണിക്കാനുള്ള കേന്ദ്ര ആഭ്യന്തര മന്ത്രാലയത്തിന്റെ നീക്കത്തെ എതിര്‍ത്ത് തോല്‍പ്പിക്കണമെന്ന് എസ്ഡിപിഐ മലപ്പുറം ജില്ലാ സെക്രട്ടറി അഡ്വ. കെസി നസീര്‍ പറഞ്ഞു. രാജ്യം ഇതുവരെ നേരിട്ടതില്‍ വെച്ചേറ്റവും പ്രയാസകരമായ അവസ്ഥയിലൂടെ കടന്നു പോകുമ്പോള്‍ ഇത്തരം നടപടികളിലൂടെ കേന്ദ്രസര്‍ക്കാര്‍ രാജ്യത്തെ ജനങ്ങളെ പരിഹസിക്കുകയാണെന്നും കെ സി നസീര്‍ പ്രസ്താവിച്ചു. മതം നോക്കി പൗരത്വ അപേക്ഷകള്‍ സ്വീകരിക്കാനുള്ള കേന്ദ്ര സര്‍ക്കാര്‍ തീരുമാനത്തിനെതിരേ ജൂണ്‍ ഒന്നിന് എസ്ഡിപിഐ നടത്തുന്ന രാജ്യ വ്യാപക പ്രതിഷേധത്തിന്റെ ഭാഗമായി തിരൂര്‍ മണ്ഡലം വീടുകളില്‍ നടത്തിയ സമര പരിപാടികളുടെ ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. ഭരണ പരാജയം മറച്ചുപിടിക്കാനാണ് കേന്ദ്ര സര്‍ക്കാര്‍ ഇത്തരം വര്‍ഗീയ നടപടികള്‍ സ്വീകരിക്കുന്നതെന്നും അദ്ദേഹം കുറ്റപ്പെടുത്തി.

എസ്ഡിപിഐ ജില്ലാ ഭാരവാഹികളായ മുഹമ്മദ് അലി, നജീബ് തിരൂര്‍, ഹംസ അന്നാര, അന്‍വര്‍ നിറമരുതൂര്‍, റസാക്ക് കല്ലന്‍, മന്‍സൂര്‍ മാസ്റ്റര്‍, മുനീര്‍ വൈലത്തൂര്‍, ഇബ്രാഹിം പുത്തു തോട്ടില്‍ എന്നിവര്‍ സംസാരിച്ചു.