കെ പി യോഹന്നാന്റെ അനധികൃത സ്വത്ത്: രാഷ്ട്രീയ പാര്‍ട്ടികളുടെ മൗനം ദുരൂഹം- എസ് ഡിപിഐ

കോട്ടയം: വിദേശനാണയ വിനിമയച്ചട്ടം ലംഘിച്ചു വിദേശരാജ്യങ്ങളില്‍ നിന്ന് കോടികള്‍ സംഭാവനകള്‍ ശേഖരിച്ച് കെ പി യോഹന്നാനും സംഘവും തട്ടിപ്പു നടത്തിയതായി ആദായ നികുതിവകുപ്പ് റെയ്ഡില്‍ കണ്ടെത്തിയ കേസില്‍ പരമ്പരാഗത രാഷ്ട്രീയ പാര്‍ട്ടികളുടെ മൗനം ദുരൂഹമാണെന്ന് എസ്.ഡി.പി.ഐ സംസ്ഥാന ജനറല്‍ സെക്രട്ടറി തുളസീധരന്‍ പള്ളിക്കല്‍ വാര്‍ത്താസമ്മേളനത്തില്‍ പറഞ്ഞു. കഴിഞ്ഞ അഞ്ച് വര്‍ഷത്തിനുളളില്‍ 6000 കോടിയോളം രൂപ ബിലീവേഴ്സ് ചര്‍ച്ചിന് സഹായമായി ലഭിച്ചെന്നും ഇത് റിയല്‍ എസ്റ്റേറ്റ്, നിര്‍മ്മാണ മേഖലകളിലേക്ക് ചെലവഴിച്ചെന്നുമാണ് അന്വേഷണ സംഘം കണ്ടെത്തിയിരിക്കുന്നത്. 17.5 കോടി രൂപയുടെ നോട്ടുകളാണ് റെയ്ഡില്‍ പിടിച്ചെടുത്തത്. ഇതില്‍ 4.5 കോടി രൂപയുടെ നോട്ടുകള്‍ നിരോധിക്കപ്പെട്ടവയാണ്. കേരളത്തില്‍ 11000 ഏക്കര്‍ ഭൂമിയാണ് അനധികൃത പണമുപയോഗിച്ച് കെ പി യോഹന്നാന്‍ വാങ്ങിക്കൂട്ടിയത്. രാജ്യത്തെ ഞെട്ടിക്കുന്ന വിദേശനാണയ വിനിമയ തട്ടിപ്പും അനധികൃത പണമിടപാടും നടത്തിയ കേസില്‍ ബി.ജെ.പി ഉള്‍പ്പെടെയുള്ള രാഷ്ട്രീയ പാര്‍ട്ടികള്‍ കാണിക്കുന്ന നിസ്സംഗത സംശയകരമാണ്. ഈ കൂട്ടുകൃഷിയില്‍ പങ്കു പറ്റുന്നവരാണ് മൗനികളാവുന്നതെന്ന ആക്ഷേപം ശരിവെക്കുന്ന തരത്തിലാണ് രാഷ്ട്രീയ പാര്‍ട്ടികളുടെ നിലപാട്. ക്രൈസ്തവ സമൂഹത്തെ ഒന്നടങ്കം സംശയത്തിന്റെ മുള്‍മുനയില്‍ നിര്‍ത്തുന്ന പ്രവര്‍ത്തനങ്ങള്‍ നടത്തിയിട്ടും അതിനെതിരേ ക്രൈസ്തവ സഭകള്‍ കാണിക്കുന്ന മൗനം സംശയം ബലപ്പെടുത്താനേ ഉപകരിക്കൂ. ബിലീവേഴ്സ് ചര്‍ച്ച്, ഗോസ്പല്‍ ഫോര്‍ ഏഷ്യ ട്രസ്റ്റ് തുടങ്ങിയ കടലാസ് ട്രസ്റ്റുകള്‍ വഴി വിദേശനാണയ വിനിമയച്ചട്ടം ലംഘിച്ചു വിദേശരാജ്യങ്ങളില്‍നിന്ന് സംഭാവനകള്‍ സ്വീകരിക്കുന്നതായും വന്‍തോതില്‍ ഭൂമിയും വിദ്യാഭ്യാസ സ്ഥാപനങ്ങളും വാങ്ങിക്കൂട്ടുന്നുവെന്നുമുള്ള പരാതികള്‍ 2012 മുതല്‍ ഉയരുന്നുണ്ടെങ്കിലും രാഷ്ട്രീയ രംഗത്തെ സ്വാധീനമുപയോഗിച്ച് അന്വേഷണം അട്ടിമറിക്കുകയായിരുന്നു. സി.പി.എമ്മും ഇടതു സര്‍ക്കാരും നടത്തിയ ഒത്തുകളിയിലൂടെയാണ് കള്ളപ്പണമുപയോഗിച്ച് ചെറുവള്ളി ഭൂമി കൈമാറ്റം നടന്നിട്ടുള്ളതെന്നാണ് നിയമസഭയില്‍ മുമ്പ് നടത്തിയ പ്രസ്താവനയിലൂടെ വ്യക്തമാകുന്നത്. ഈ അനധികൃത ഇടപാടിന് നിയമസാധുത നല്‍കാനുള്ള ശ്രമങ്ങളാണ് സംസ്ഥാന സര്‍ക്കാര്‍ നടത്തുന്നത്. തട്ടിപ്പില്‍ പങ്കാളികളായ കെ പി യോഹന്നാന്‍ ഉള്‍പ്പെടെയുള്ളവരെ കസ്റ്റഡിയിലെടുത്ത് സാമ്പത്തിക ഇടപാടുകള്‍ സംബന്ധിച്ച് സമഗ്രാന്വേഷണം നടത്തണമെന്നും തുളസീധരന്‍ പള്ളിക്കല്‍ ആവശ്യപ്പെട്ടു.

വാര്‍ത്താസമ്മേളനത്തില്‍ സംസ്ഥാന ട്രഷറര്‍ അജ്മല്‍ ഇസ്മായീല്‍, കോട്ടയം ജില്ലാ പ്രസിഡന്റ് യു നവാസ് എന്നിവരും സംബന്ധിച്ചു.