യുവാവിനെ കൊന്ന് കഷ്ണങ്ങളാക്കിയ കേസില്‍ ഇന്ന് ശിക്ഷ വിധിക്കും

കോട്ടയം: പയ്യപ്പാടി മലകുന്നം വര്‍ഗീസ് ഫിലിപ്പിനെ (34) കൊന്നു കഷ്ണങ്ങളാക്കിയെന്ന കേസില്‍ കോടതി ഇന്ന് വിധി പറയും. പ്രതികളായ, മീനടം പീടികപ്പടിയില്‍ വാടകയ്ക്കു താമസിച്ചിരുന്ന മുട്ടമ്പലം വെട്ടിമറ്റം വീട്ടില്‍ എ ആര്‍ വിനോദ് കുമാര്‍ (കമ്മല്‍ വിനോദ് 46), ഭാര്യ എന്‍ എസ് കുഞ്ഞുമോള്‍ (44) എന്നിവര്‍ കുറ്റക്കാരാണെന്നു കഴിഞ്ഞ ദിവസം ജില്ലാ അഡിഷനല്‍ സെഷന്‍സ് കോടതി കണ്ടെത്തിയിരുന്നു.

സുഹൃത്തായിരുന്ന വര്‍ഗീസിനെ കുഞ്ഞുമോള്‍ വീട്ടിലേക്കു വിളിച്ചുവരുത്തിയെന്നും പിന്നിലൂടെയെത്തി വിനോദ് കമ്പിവടികൊണ്ട് അടിച്ചുവീഴ്ത്തി കൊലപ്പെടുത്തിയെന്നുമാണു കേസ്. ശരീരഭാഗങ്ങള്‍ വിവിധ ഇടങ്ങളില്‍ ചാക്കിലും പ്ലാസ്റ്റിക് കവറുകളിലും ഉപേക്ഷിച്ചു. ശരീരത്തിന്റെ ഒരു ഭാഗം കണ്ടെത്തിയപ്പോള്‍ പോലിസിനു ലഭിച്ച ഷര്‍ട്ടിലെ ബട്ടന്‍സും കൊലപാതകം നടന്ന സ്ഥലത്തു നിന്നു ലഭിച്ച ഷര്‍ട്ടിലെ ബട്ടന്‍സും ഒരുപോലെയെന്നു കണ്ടെത്തിയതാണു കേസില്‍ നിര്‍ണായകമായത്. പ്രതികളുടെയും കൊല്ലപ്പെട്ട വര്‍ഗീസിന്റെയും ടവര്‍ ലൊക്കേഷന്‍ ഒരിടത്തായിരുന്നുവെന്നും കണ്ടെത്തി.