സുരേഷ് ഗോപിയുമായി അടുത്ത ബന്ധമുള്ളയാള്‍ക്കും തൃശ്ശൂരില്‍ വ്യാജവോട്ട്

തൃശൂര്‍: തൃശൂര്‍ ലോക്‌സഭാ മണ്ഡലത്തിലെ വോട്ടര്‍ പട്ടിക ക്രമക്കേടില്‍ കൂടുതല്‍ തെളിവുകള്‍. പൂങ്കുന്നത്തെ ക്യാപ്പിറ്റല്‍ അപാര്‍ട്ട്‌മെന്റില്‍ താമസിക്കാതെ വോട്ടുചേര്‍ത്ത മറ്റൊരാളും തിരുവനന്തപുരം സ്വദേശിയെന്ന് കണ്ടെത്തി തിരുവനന്തപുരം പുന്നയ്ക്കാമുകള്‍ സ്വദേശി സന്തോഷ് കുമാറാണ് പൂങ്കുന്നത്ത് വ്യാജ മേല്‍വിലാസത്തില്‍ വോട്ട് ചേര്‍ത്തത്. കഴിഞ്ഞ നിയമസഭാ തിരഞ്ഞെടുപ്പിലും തദ്ദേശ കരട് വോട്ടര്‍പട്ടികയിലും ഇയാള്‍ക്ക് വോട്ട് തിരുവനന്തപുരത്തെ പാങ്ങോട് എല്‍പിഎസിലാണ്. സുരേഷ് ഗോപിയുമായി അടുത്ത ബന്ധമുള്ള ആളാണ് സന്തോഷ് കുമാര്‍.

ബിജെപി സംസ്ഥാന ഉപാധ്യക്ഷനായ വി ഉണ്ണികൃഷ്ണന്‍, ബിജെപി തൃശൂര്‍ ജില്ലാ കമ്മിറ്റി വൈസ് പ്രസിഡന്റ് വി ആതിരയുടെ വിലാസം ഉപയോഗിച്ച് വോട്ട് ചെയ്‌തെന്ന് കൈരളി ന്യൂസ് റിപോര്‍ട്ട് ചെയ്യുന്നു. വി ഉണ്ണികൃഷ്ണന് ഇരട്ട വോട്ടുണ്ടായിരുന്നതിന്റെ തെളിവുകള്‍ ഇപ്പോള്‍ പുറത്ത് വന്നിട്ടുണ്ട്. ഇയാള്‍ പൊന്നാനി ലോക്‌സഭാ മണ്ഡലത്തിലെ വോട്ടറാണ്. ഈ വിവരങ്ങള്‍ പ്രകാരം ഇയാള്‍ക്ക് ഇപ്പോള്‍ തൃശൂര്‍ ലോക്‌സഭാ മണ്ഡലത്തിലും വോട്ട് ഉണ്ട്. എന്നാല്‍ തൃശൂരില്‍ മാത്രമാണ് വോട്ട് ചെയ്തതെന്ന് വി ഉണ്ണികൃഷ്ണന്‍ പറഞ്ഞു.