മെഡിക്കല്‍ പിജിക്ക് കോഴ: അസിറ്റന്റ് ഡീന്‍ അറസ്റ്റില്‍

മുംബൈ: മെഡിക്കല്‍ പിജിക്ക് അഡ്മിഷന്‍ നല്‍കാമെന്നു പറഞ്ഞ് കൈക്കൂലി വാങ്ങിയ അസിറ്റന്റ് ഡീന്‍ അറസ്റ്റില്‍. മുംബൈയിലെ ലോക്മാന്യ തിലക് മുന്‍സിപ്പല്‍ ജനറല്‍ ആശുപത്രിയിലെ അസിസ്റ്റന്റ് ഡീന്‍ രാകേഷ് വര്‍മ ആണ് അറസ്റ്റിലായത്. 50 ലക്ഷം രൂപയാണ് മധ്യപ്രദേശിലെ അലീഷ അബ്ദുല്ല ഷെയ്ഖ് എന്ന യുവ ഡോക്ടറില്‍ നിന്ന് ഇയാള്‍ കൈക്കൂലി വാങ്ങിയത്. പണം കൈപറ്റിയതിന് ശേഷം ഇയാള്‍ വാക്കു പാലിക്കാത്തതിനെ തുടര്‍ന്നാണ് അലീഷ പരാതി നല്‍കിയത്.

പരാതിയില്‍ നടത്തിയ അന്വേഷണത്തില്‍ നിന്നും വര്‍മയുടെ അക്കൗണ്ടില്‍ അലീഷയുടെ പിതാവ് 21.10 ലക്ഷം രൂപ നിക്ഷേപിച്ചതായി കണ്ടെത്തി. മാസങ്ങളോളം തങ്ങളെ കബളിപ്പിച്ചെന്നും പരാതിയില്‍ പറയുന്നു. പൊലീസിന്റെ ചോദ്യം ചെയ്യലില്‍ വര്‍മ കുറ്റം സമ്മതിച്ചു. ഇയാളെ ബുധനാഴ്ച്ചയാണ് അറസ്റ്റ് ചെയ്തത്.