സമാധാനം മാത്രമാണ് നമ്മുടെ സുരക്ഷക്കുള്ള ഏക മാര്‍ഗം; ഇന്ത്യയും പാകിസ്താനും തമ്മിലുള്ള സംഘര്‍ഷങ്ങള്‍ ഇല്ലാതാക്കണമെന്ന് മലാല യൂസഫ്‌സായി

ന്യൂഡല്‍ഹി: ഇന്ത്യയും പാകിസ്താനും തമ്മിലുള്ള സംഘര്‍ഷങ്ങള്‍ ഇല്ലാതാക്കാന്‍ നേതാക്കള്‍ മുന്നോട്ട് വരണമെന്നും സുരക്ഷക്കുള്ള ഏക മാര്‍ഗം സമാധാനമാണെന്നും നോബല്‍ സമ്മാന ജേതാവ് മലാല യൂസഫ്‌സായി. സമൂഹ മാധ്യമമായ എക്‌സിലാണ് പ്രതികരണം.

എക്‌സ് പോസ്റ്റിന്റെ പൂര്‍ണ്ണരൂപം

'വെറുപ്പും അക്രമവും നമ്മുടെ പൊതു ശത്രുക്കളാണ്. ഇന്ത്യയിലെയും പാകിസ്ഥാനിലെയും നേതാക്കള്‍ സംഘര്‍ഷങ്ങള്‍ കുറയ്ക്കുന്നതിനും, സാധാരണക്കാരെ, പ്രത്യേകിച്ച് കുട്ടികളെ സംരക്ഷിക്കുന്നതിനും, വിഭജന ശക്തികള്‍ക്കെതിരെ ഒന്നിക്കുന്നതിനും നടപടികള്‍ സ്വീകരിക്കണമെന്ന് ഞാന്‍ ശക്തമായി അഭ്യര്‍ഥിക്കുന്നു.

ഇരു രാജ്യങ്ങളിലെയും നിരപരാധികളായ ഇരകളുടെ പ്രിയപ്പെട്ടവര്‍ക്ക് എന്റെ അഗാധമായ അനുശോചനം അറിയിക്കുന്നു. ഈ അപകടകരമായ സമയത്ത് പാകിസ്താനിലെ എന്റെ എല്ലാ സുഹൃത്തുക്കളെയും കുടുംബാംഗങ്ങളെയും ഞങ്ങള്‍ക്കൊപ്പം പ്രവര്‍ത്തിക്കുന്ന എല്ലാ അധ്യാപകരെയും അഭിഭാഷകരെയും പെണ്‍കുട്ടികളെയും കുറിച്ച് ഞാന്‍ ചിന്തിക്കുകയാണ്.

സംവാദവും നയതന്ത്രവും പ്രോത്സാഹിപ്പിക്കുന്നതിന് അന്താരാഷ്ട്ര സമൂഹം ഇപ്പോള്‍ പ്രവര്‍ത്തിക്കണം. നമ്മുടെ കൂട്ടായ സുരക്ഷയ്ക്കും സമൃദ്ധിക്കും സമാധാനം മാത്രമാണ് ഏക മാര്‍ഗം.