ലക്കി ബില്‍ വിജയികള്‍ക്ക് കെ.ടി.ഡി.സി റിസോര്‍ട്ടുകളില്‍ ആഡംബര താമസം

തിരുവനന്തപുരം: സംസ്ഥാന ജി.എസ്.ടി വകുപ്പ് പുറത്തിറക്കിയ ജി.എസ്.ടി. ലക്കി ബില്‍ ആപ്പിലെ പ്രതിവാര നറുക്കെടുപ്പില്‍ വിജയികളായവര്‍ക്ക് ഇനി കെ.ടി.ഡി.സി റിസോര്‍ട്ടുകളില്‍ ആഡംബര താമസം.

ലക്കി ബില്‍ ആപ്പിന്റെ ആദ്യ പ്രതിവാര നറുക്കെടുപ്പാണ് നടന്നത്. നറുക്കെടുപ്പില്‍ വിജയികളായ 25 പേര്‍ക്ക് കെ.ടി.ഡി.സി യുടെ കീഴിലുള്ള തിരുവനന്തപുരത്തെ മസ്‌കറ്റ് ഹോട്ടല്‍, കുമരകത്തെ വാട്ടര്‍ സ്‌കേപ്‌സ് റിസോര്‍ട്ട്, മൂന്നാര്‍ ടീ കൗണ്ടി ഹില്‍ റിസോര്‍ട്, തേക്കടി ആരണ്യ നിവാസ്, കൊച്ചിയിലെ ബോള്‍ഗാട്ടി പാലസ് ആന്‍ഡ് ഐലന്റ് റിസോര്‍ട് എന്നിവിടങ്ങളിലാണ് സൗജന്യ താമസ സൗകര്യം ലഭിക്കുന്നത്.

വിജയികള്‍ക്ക് രണ്ട് രാത്രിയും മൂന്ന് പകലും ഉള്‍പ്പെടുന്ന താമസ സൗകര്യമാണ് സമ്മാനമായി ലഭിക്കുന്നത്. വിജയികള്‍ ലക്കി ബില്‍ ആപ്പിലെ റിവാര്‍ഡ് വിഭാഗത്തില്‍ ലഭിച്ച സന്ദേശത്തില്‍ നല്‍കിയിട്ടുള്ള ഫോണ്‍ നമ്പരിലോ, ഇമെയില്‍ വിലാസത്തിലോ ബന്ധപ്പെട്ട് താമസം ബുക്ക് ചെയ്യണം.

പ്രതിദിന നറുക്കെടുപ്പില്‍ ഇതുവരെ വിജയികളായവര്‍ക്കുള്ള ഗിഫ്റ്റ് പാക്കറ്റുകള്‍ ഏതാനും ദിവസത്തിനുള്ളില്‍ വിജയികളായവരുടെ മേല്‍ വിലാസത്തില്‍ ലഭിച്ച് തുടങ്ങും. പ്രതിദിന നറുക്കെടുപ്പിലെ വിജയികള്‍ക്ക് കുടുംബശ്രീ, വനശ്രീ എന്നിവര്‍ നല്‍കുന്ന 1,000 രൂപ വിലയുള്ള ഗിഫ്റ്റ് പാക്കറ്റാണ് സമ്മാനമായി ലഭിക്കുന്നത്. 10 ലക്ഷം രൂപ ഒന്നാം സമ്മാനം ഉള്ള പ്രതിമാസ നറുക്കെടുപ്പ് സെപ്റ്റംബര്‍ ആദ്യവാരത്തില്‍ നടക്കും. ഓണത്തോട് അനുബന്ധിച്ച് 25 ലക്ഷം രൂപ സമ്മാനം നല്‍കുന്ന ബംബര്‍ നറുക്കെടുപ്പും നടക്കും.