യുവതി വെട്ടേറ്റു മരിച്ച സംഭവം: കാണാതായ കുട്ടിയേയും കൊലയാളിയേയും കണ്ടെത്തി

തിരുനെല്ലി: അപ്പപ്പാറയില്‍ വെട്ടേറ്റുമരിച്ച യുവതിയുടെ പരുക്കേറ്റ ഒമ്പതു വയസുകാരിയായ മകളെയും പ്രതിയേയും കണ്ടെത്തി. പ്രതി ദിലീഷിനൊപ്പമാണ് കുട്ടിയെ കണ്ടെത്തിയത്. അടുത്ത തോട്ടത്തില്‍ നിന്നാണ് ഇരുവരേയും കണ്ടെത്തിയത്. കുട്ടിയെ ആശുപത്രിയിലേക്ക് മാറ്റി. തിരുനെല്ലി വാകേരിയില്‍ വാടകവീട്ടില്‍ താമസിക്കുന്ന പ്രവീണ ഇന്നലെയാണ് വെട്ടേറ്റ് മരിച്ചത്. ഭര്‍ത്താവുമായി അകന്നു നില്‍ക്കുന്ന പ്രവീണ ദിലീഷിനൊപ്പമായിരുന്നു താമസം. ഇവര്‍ക്കൊപ്പം പ്രവീണയുടെ രണ്ടു പെണ്‍മക്കളുമുണ്ടായിരുന്നു. ഇതില്‍ പതിനാല് വയസുള്ള പെണ്‍കുട്ടിയെയും ദിലീഷ് വെട്ടിയിരുന്നു.

ചെവിക്കും കഴുത്തിലുമാണ് പെണ്‍കുട്ടിക്ക് വെട്ടേറ്റത്. കുട്ടിയെ മാനന്തവാടി മെഡിക്കല്‍ കോളജില്‍ പ്രവേശിപ്പിച്ചിരുന്നു. എന്നാല്‍, ഒമ്പതുകാരിയായ മകളെയും ദിലീഷിനെയും കണ്ടെത്താന്‍ കഴിഞ്ഞിരുന്നില്ല. തുടര്‍ന്ന് നടത്തിയ പരിശോധനയിലാണ് ഇരുവരെയും കണ്ടെത്തിയത്.