കരൂര്‍ ദുരന്തം: രാഹുല്‍ ഗാന്ധിയോട് സംസാരിച്ച് വിജയ്

ചെന്നൈ: കരൂര്‍ ദുരന്തത്തെ തുടര്‍ന്ന് പ്രതിപക്ഷ നേതാവുമായി ചര്‍ച്ച നടത്തി നടനും ടിവികെ നേതാവുമായ വിജയ്. 15 മിനിറ്റ് നീണ്ടു നിന്ന ചര്‍ച്ചയാണ് എന്നാണ് വിവരം. ഫോണ്‍ വഴിയാണ് ഇരുവരും സംസാരിച്ചത്. എന്താണ് സംസാരിച്ചത് എന്ന കാര്യത്തില്‍ വിവരങ്ങള്‍ ലഭ്യമല്ല. നിലവില്‍ വിജയിക്ക് കരൂര്‍ സന്ദര്‍ശിക്കാന്‍ അനുമതി നല്‍കിയിട്ടില്ല. കേസില്‍ പ്രത്യേക അന്വേഷണ സംഘത്തെ നിയോഗിച്ചു. നിലവില്‍ വിജയിയെ കേസില്‍ പ്രതി ചേര്‍ത്തിട്ടില്ല.

ഇന്നലെയാണ് കരൂരിലെ അപകടം നടക്കുന്നത്. വിജയിയുടെ റാലിയില്‍ പ്രതീക്ഷിച്ചതിലധികം ആളുകള്‍ വന്നതോടെയായിരുന്നു അപകടം. പരിപാടിയില്‍ പങ്കെടുക്കാന്‍ ആറുമണിക്കൂര്‍ വൈകിയാണ് വിജയ് സ്ഥലത്തെത്തിയത്.പരിപാടിക്കിടെ ആളുകള്‍ കുഴഞ്ഞുവീഴുകയായിരുന്നു. ഇവരെ ഉടന്‍ തന്നെ കരൂര്‍ മെഡിക്കല്‍ കോളേജ് ആശുപത്രിയിലും സമീപത്തെ ആശുപത്രികളിലും പ്രവേശിപ്പിച്ചിരുന്നു. കഴിഞ്ഞ ദിവസം ഉച്ചയോടെ 40 പേരുടെ മരണം സ്ഥിരീകരിച്ചു. ഇതില്‍ 10 കുട്ടികളും 16 സ്ത്രീകളും 12 പുരുഷന്മാരും രണ്ട് ഗര്‍ഭിണികളും ഒരു ഒന്നരവയസുകാരനും ഉള്‍പ്പെടുന്നു. ഇതിനുപിന്നാലെ സംഭവത്തില്‍ ഗുരുതര പരിക്കേറ്റ് ചികില്‍സയിലായിരുന്ന ഒരാള്‍ കൂടി കൊല്ലപ്പെട്ടതോടെ മരണം 41 ആയി.

മരിച്ചവരുടെ കുടുംബാംഗങ്ങള്‍ക്ക് 20 ലക്ഷം രൂപയും പരിക്കേറ്റവരുടെ കുടുംബാംഗങ്ങള്‍ക്ക് രണ്ട് ലക്ഷം രൂപയും വിജയ് ധനസഹായം പ്രഖ്യാപിച്ചിരുന്നു. മരിച്ചവരുടെ കുടുംബാംഗങ്ങള്‍ക്ക് 10 ലക്ഷം രൂപയും പരിക്കേറ്റവര്‍ക്ക് ഒരുലക്ഷം രൂപയും സര്‍ക്കാര്‍ പ്രഖ്യാപിച്ചിരുന്നു.