16 വയസ്സിന് താഴെയുള്ള കുട്ടികളിലെ സോഷ്യല്‍ മീഡിയ നിയന്ത്രണം പരിഗണനയിലെന്ന് കര്‍ണാടക സര്‍ക്കാര്‍

ബെംഗളൂരു: 16 വയസ്സിന് താഴെയുള്ള കുട്ടികള്‍ക്ക് സോഷ്യല്‍ മീഡിയ ഉപയോഗിക്കുന്നത് നിരോധിക്കുന്ന കാര്യം പരിഗണിക്കാനൊരുങ്ങി കര്‍ണാടക സര്‍ക്കാര്‍. ഈ നിയമം ഓസ്ട്രേലിയയിലും ഗോവയിലും ഇതിനകം നടപ്പിലാക്കിയിട്ടുണ്ട്, സമാനമായ മാതൃക പിന്തുടര്‍ന്ന് സംസ്ഥാന സര്‍ക്കാരും നടപടിയെടുക്കുന്നതിനെക്കുറിച്ച് ആലോചിക്കുന്നുണ്ടെന്നാണ് റിപോര്‍ട്ടുകള്‍.

സോഷ്യല്‍ മീഡിയയുടെ ദുരുപയോഗം ഗുരുതരമായ പ്രശ്നമാണെന്ന് നിയമസഭയില്‍ ഗ്രാമവികസന, പഞ്ചായത്ത് രാജ്, ഐടി-ബിടി മന്ത്രി പ്രിയങ്ക് ഖാര്‍ഗെ പറഞ്ഞു.

സോഷ്യല്‍ മീഡിയയുടെ ദുരുപയോഗത്തെക്കുറിച്ച് മുതിര്‍ന്ന ബിജെപി നേതാവും എംഎല്‍എയുമായ എസ് സുരേഷ് കുമാര്‍ ആശങ്ക പ്രകടിപ്പിച്ചതിനുള്ള മറുപടിയായാണ് മന്ത്രി ഈ വിവരങ്ങള്‍ നല്‍കിയത്.മെറ്റയുമായി സഹകരിച്ചാണ് ഐടി-ബിടി വകുപ്പ് ഈ പരിപാടി നടത്തുന്നത്, ഇതുവരെ മൂന്ന് ലക്ഷത്തിലധികം കുട്ടികളും ഒരു ലക്ഷത്തിലധികം അധ്യാപകരും ഇതില്‍ പങ്കെടുത്തിട്ടുണ്ടെന്ന് അദ്ദേഹം പറഞ്ഞു.

വ്യാഴാഴ്ച ലോക്സഭയില്‍ അവതരിപ്പിച്ച 2025-26 ലെ സാമ്പത്തിക സര്‍വേ, കുട്ടികള്‍ സോഷ്യല്‍ മീഡിയ ഉപയോഗിക്കുന്നതിന് പ്രായാധിഷ്ഠിത നിയന്ത്രണങ്ങള്‍ ഏര്‍പ്പെടുത്താന്‍ സര്‍ക്കാരിനോട് ശുപാര്‍ശ ചെയ്തതായി സുരേഷ് കുമാര്‍ നിയമസഭയില്‍ പറഞ്ഞു.