തൊഴിലുറപ്പ് ഭേദഗതി ബില്ലിനെതിരേ രാജ്യവ്യാപകപ്രതിഷേധം സംഘടിപ്പിക്കുമെന്ന് ജോണ്‍ ബ്രിട്ടാസ്

ന്യൂഡല്‍ഹി: തൊഴിലുറപ്പ് ഭേദഗതി ബില്ല് രണ്ടാം ഗാന്ധിവധത്തിന് തുല്യമെന്നും ഇന്ത്യയുടെ ചരിത്രത്തില്‍ ഇതുപോലെ നിയമ നിര്‍മ്മാണം നടന്നിട്ടില്ലെന്നും ഡോ. ജോണ്‍ ബ്രിട്ടാസ് എംപി. ഈ നിയമനിര്‍മ്മാണത്തിനെതിരെ ഡിസംബര്‍ 22-ന് ഇടതുപക്ഷ പാര്‍ട്ടികള്‍ ദേശീയതലത്തില്‍ പ്രതിഷേധം സംഘടിപ്പിക്കുമെന്നും അദ്ദേഹം വ്യക്തമാക്കി.

ഗ്രാമീണ മേഖലയിലെ ദരിദ്രരെ സഹായിക്കാന്‍ യുപിഎ സര്‍ക്കാരിന്റെ കാലത്ത് കൊണ്ടുവന്ന ഈ സുപ്രധാന പദ്ധതിയെ ഇല്ലാതാക്കാനുള്ള നീക്കമാണിതെന്നും അദ്ദേഹം ആരോപിച്ചു.

പുതിയ നിയമം വരുന്നതോടെ പദ്ധതിയുടെ 40 ശതമാനം സാമ്പത്തിക ബാധ്യത സംസ്ഥാനങ്ങള്‍ വഹിക്കേണ്ടി വരും. ഇത് രാജ്യത്തെ സംസ്ഥാനങ്ങള്‍ക്ക് ആകെ 50,000 കോടി രൂപയുടെ അധികഭാരം ഉണ്ടാക്കുമെന്നും അദ്ദേഹം പറഞ്ഞു. ബില്ലിന്റെ പേരുമാറ്റമെന്നത് മഹാത്മാ ഗാന്ധിയെ രണ്ടാമത് വധിക്കുന്നതിന് തുല്യമാണെന്നും പ്രതിപക്ഷത്തിന്റെ പ്രതിഷേധം കണക്കിലെടുക്കാതെ ദൃതി പിടിച്ചാണ് കേന്ദ്രം ബില്ല് പാസാക്കിയതെന്നും അദ്ദേഹം വ്യക്തമാക്കി.