മലപ്പുറത്തിന്റെ ജനകീയനായ കലക്ടര്‍ ജാഫര്‍ മാലിക്കിന് സ്ഥലം മാറ്റം; കെ ഗോപാലകൃഷ്ണന്‍ പുതിയ കലക്ടര്‍

മലപ്പുറം: മലപ്പുറത്തിന്റെ ജനകീയനായ കലക്ടര്‍ ജാഫര്‍ മാലിക്കിന് സ്ഥലം മാറ്റം. കെ ഗോപാലകൃഷ്ണനെ ജില്ലയുടെ പുതിയ കലക്ടറായി സര്‍ക്കാര്‍ നിയമിച്ചു. ഇന്ന് ചേര്‍ന്ന മന്ത്രിസഭാ യോഗമാണ് തിരുവനന്തപുരം ജില്ലാ കലക്ടറായ കെ ഗോപാലകൃഷ്ണനെ ജില്ലയുടെ പുതിയ കലക്ടറായി നിയമിച്ചത്. 2013 ബാച്ച് ഐഎഎസ് ഉദ്യോഗസ്ഥനാണ് തമിഴ്‌നാട് നാമക്കല്‍ സ്വദേശിയായ ഇദ്ദേഹം. മെക്കാനിക്കല്‍ എഞ്ചിനീയറിങ് ബിരുദധാരിയാണ്. അഞ്ച് വര്‍ഷത്തോളം അമേരിക്കയില്‍ ജോലി ചെയ്ത ശേഷമാണ് ഇന്ത്യയിലേക്ക് തിരിച്ചെത്തി സിവില്‍ സര്‍വീസ് നേടിയത്. മലപ്പുറത്ത് അസിസ്റ്റന്റ് കലക്ടറായി സേവനമനുഷ്ടിച്ചിട്ടുണ്ട്. തിരുവനന്തപുരം കലക്ടറായിരിക്കെ പ്രളയ കാലത്തും, കോവിഡ് പ്രതിരോധത്തിലും ഇദ്ദേഹമെടുത്ത മുന്‍കരുതലുകള്‍ ചര്‍ച്ചയായിരുന്നു.