ബംഗാളി സംസാരിക്കുന്ന മുസ് ലിംകളെ അനധികൃതമായി തടങ്കലില്‍ വയ്ക്കുന്നതില്‍ വന്‍ വര്‍ധന: എപിസിആര്‍ റിപോര്‍ട്ട്

ന്യൂഡല്‍ഹി: 2025 മെയ് മുതല്‍ ജൂലൈ വരെയുള്ള കാലയളവില്‍, മഹാരാഷ്ട്ര, ഗുജറാത്ത്, ഡല്‍ഹി, ഒഡീഷ, അസം തുടങ്ങിയ നിരവധി ഇന്ത്യന്‍ സംസ്ഥാനങ്ങളില്‍ ബംഗാളി സംസാരിക്കുന്ന മുസ് ലിംകളെ തടങ്കലില്‍ വയ്ക്കുന്നതിലും നിര്‍ബന്ധിതമായി നാടുകടത്തുന്നതിലും കുത്തനെ വര്‍ധനയുണ്ടായതായി അസോസിയേഷന്‍ ഫോര്‍ പ്രൊട്ടക്ഷന്‍ ഓഫ് സിവില്‍ റൈറ്റ്‌സ് (എപിസിആര്‍) സമാഹരിച്ച ഡാറ്റ വ്യക്തമാക്കുന്നു.

' ബ്രാന്‍ഡഡ് ആസ് ബംഗ്ലാദേശീസ് ' എന്ന തലക്കെട്ടിലുള്ള എപിസിആര്‍ റിപോര്‍ട്ട്, 2025 മെയ് മുതല്‍ ജൂലൈ വരെ ആയിരക്കണക്കിന് വ്യക്തികളെ, അവരില്‍ പലരും സാധുവായ ആധാര്‍ കാര്‍ഡുകള്‍, വോട്ടര്‍ ഐഡികള്‍, മറ്റ് താമസ തെളിവുകള്‍ എന്നിവയുള്ള ഇന്ത്യന്‍ പൗരന്മാരെ, 'നിയമവിരുദ്ധ ബംഗ്ലാദേശി കുടിയേറ്റക്കാര്‍' എന്ന് ഏകപക്ഷീയമായി മുദ്രകുത്തി നിയമവിരുദ്ധമായ തടങ്കലിനും നാടുകടത്തലിനും വിധേയരാക്കിയത് എങ്ങനെയെന്ന് രേഖപ്പെടുത്തുന്നു.

1,500ലധികം പേരെ ലക്ഷ്യം വച്ചിരിക്കാമെന്ന് ഹ്യൂമന്‍ റൈറ്റ്‌സ് വാച്ചും സിവില്‍ സൊസൈറ്റി ഗ്രൂപ്പുകളും ചൂണ്ടിക്കാണിച്ചതായി റിപോര്‍ട്ട് പറയുന്നു. 'അര്‍ദ്ധരാത്രിയിലെ റെയ്ഡുകളില്‍ നിരവധി പേരെ അറസ്റ്റ് ചെയ്തു, നിയമസഹായം നിഷേധിച്ചു, മനുഷ്യത്വരഹിതമായ സാഹചര്യങ്ങളില്‍ താല്‍ക്കാലിക തടങ്കല്‍പ്പാളയങ്ങളില്‍ പാര്‍പ്പിച്ചു. ഡല്‍ഹി, പൂനെ, ഗുരുഗ്രാം എന്നിവിടങ്ങളില്‍ കുട്ടികളെയും വെറുതെ വിട്ടില്ല. ചില കേസുകളില്‍, നിയമപരമായ നടപടിക്രമങ്ങളൊന്നുമില്ലാതെ വ്യക്തികളെ ബംഗ്ലാദേശ് അതിര്‍ത്തിയിലൂടെ ബലമായി തള്ളിവിട്ടെന്നും റിപോര്‍ട്ട് ചൂണ്ടിക്കാട്ടുന്നു.

ശരിയായ നിയമ നടപടിക്രമങ്ങളില്ലാതെയാണ് പലപ്പോഴും ഈ തടങ്കലുകള്‍ നടന്നതെന്ന് റിപോര്‍ട്ട് കാണിക്കുന്നു. ചില സന്ദര്‍ഭങ്ങളില്‍, ആളുകളെ ബലപ്രയോഗത്തിലൂടെ ബംഗ്ലാദേശ് അതിര്‍ത്തിക്കപ്പുറത്തേക്ക് പോലും അയച്ചു. പലര്‍ക്കും നിയമസഹായം നിഷേധിക്കപ്പെട്ടു, അവരുടെ കുടുംബങ്ങള്‍ക്ക് അവരെ ബന്ധപ്പെടാനോ കണ്ടെത്താനോ ഒരു മാര്‍ഗവുമില്ലായിരുന്നു.ഭരണഘടനാ അവകാശങ്ങളുടെയും അടിസ്ഥാന മനുഷ്യ അന്തസ്സിന്റെയും ലംഘനങ്ങളെക്കുറിച്ച് ഗുരുതരമായ ആശങ്കകളാണ് ഈ സാഹചര്യം ഉയര്‍ത്തുന്നത്.