പ്രിയങ്ക ഗാന്ധിയുടെ മകളെ കുറിച്ച് വ്യാജ പ്രചാരണം; പോലിസ് കേസെടുത്തു

ഷിംല: കോണ്‍ഗ്രസ് നേതാവ് പ്രിയങ്ക ഗാന്ധി വധേരയുടെ മകള്‍ മിറായ വധേരയുടെ സ്വത്ത് സംബന്ധിച്ച് തെറ്റിദ്ധരിപ്പിക്കുന്നതും അടിസ്ഥാനരഹിതവുമായ പോസ്റ്റിട്ടതിന് ഒരാള്‍ക്കെതിരെ ഹിമാചല്‍ പ്രദേശ് പോലിസ് കേസെടുത്തു. ഇന്ത്യന്‍ ശിക്ഷാനിയമത്തിലെ 153 (കലാപത്തിനുള്ള പ്രകോപനം), 469 (വ്യാജരേഖ ചമക്കല്‍), 500 (അപകീര്‍ത്തിപ്പെടുത്തല്‍), 505 (മറ്റേതെങ്കിലും സമുദായത്തിനെതിരായ കുറ്റകൃത്യത്തിന് ഒരു സമൂഹത്തെയോ വ്യക്തികളെയോ പ്രേരിപ്പിക്കുക) എന്നീ വകുപ്പുകള്‍ പ്രകാരമാണ് തിങ്കളാഴ്ച ഷിംല ഈസ്റ്റ് പോലിസ് സ്‌റ്റേഷനില്‍ അനൂപ് വര്‍മ എന്നയാള്‍ക്കെതിരെ കേസ് രജിസ്റ്റര്‍ ചെയ്തത്.

മിറായക്കെതിരെ ഇയാള്‍ തെറ്റിദ്ധരിപ്പിക്കുന്നതും അടിസ്ഥാനരഹിതവുമായ പോസ്റ്റ് ട്വീറ്റ് ചെയ്തുവെന്നാരോപിച്ച് കോണ്‍ഗ്രസ് അംഗം പ്രമോദ് ഗുപ്ത നല്‍കിയ പരാതിയിലാണ് നടപടി.

മിറായക്ക് 3000 കോടി രൂപയുടെ സ്വത്തുണ്ടെന്നായിരുന്നു ട്വീറ്റ്. പാര്‍ലമെന്റ് തിരഞ്ഞെടുപ്പിനിടെ തെറ്റായതും അടിസ്ഥാനരഹിതവുമായ ട്വീറ്റ് പോസ്റ്റ് ചെയ്തത് കോണ്‍ഗ്രസിന്റെ വിശ്വാസ്യതയെ പ്രതികൂലമായി ബാധിക്കുകയും ജനമനസ്സില്‍ പാര്‍ട്ടിയോട് വെറുപ്പ് തോന്നുകയും ചെയ്യുമെന്ന് ഗുപ്ത പരാതിയില്‍ ചൂണ്ടിക്കാട്ടി.

തെറ്റായ പോസ്റ്റ് സോണിയ ഗാന്ധിയുടെയും പ്രിയങ്ക ഗാന്ധിയുടെയും പേരും പ്രശസ്തിയും കളങ്കപ്പെടുത്തിയെന്നും ഹിമാചല്‍ പ്രദേശിലെ കോണ്‍ഗ്രസ് പ്രവര്‍ത്തകരിലും പൊതുജനങ്ങളിലും രോഷം സൃഷ്ടിക്കുകയും ഇത് പൊതു സമാധാനത്തിന് ഭംഗം വരുത്തുമെന്നും പരാതിയിലുണ്ട്.