ആലപ്പുഴയില്‍ ടൂറിസ്റ്റ് കാര്‍ ഡ്രൈവറെ വെട്ടിപ്പരിക്കേല്‍പ്പിച്ച നാലംഗ സംഘം പിടിയില്‍

ആലപ്പുഴ: മദ്യം പങ്കുവെക്കുന്നതിനിടെയുണ്ടായ തര്‍ക്കത്തെത്തുടര്‍ന്ന് ടൂറിസ്റ്റ് കാര്‍ ഡ്രൈവറെ വെട്ടിപ്പരിക്കേല്‍പ്പിച്ച സംഭവത്തില്‍ നാലുപേര്‍ അറസ്റ്റില്‍. കോട്ടയം കാഞ്ഞിരപ്പള്ളി കൂവപ്പള്ളി കാരപ്ലാക്കല്‍ വിചിന്‍ (28), ആലപ്പുഴ കലവൂര്‍ മണ്ണഞ്ചേരി കണ്ണന്തറവെളിയില്‍ അലക്‌സ് (19), നോര്‍ത്ത് ആര്യാട് മണ്ണാപറമ്പ് വീട്ടില്‍ ദീപക് (33), ചേര്‍ത്തല സി.എം.സി. 3 അരയശ്ശേരി വീട്ടില്‍ സുജിത്ത് (28) എന്നിവരാണ് പിടിയിലായത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

കഴിഞ്ഞ ബുധനാഴ്ച രാത്രി 10.30-ഓടെ ആലപ്പുഴയിലെ റിസോര്‍ട്ടിന് സമീപമാണ് സംഭവം നടന്നത്. കോഴിക്കോട് സ്വദേശിയായ ജംഷീറിനാണ് ആക്രമണത്തില്‍ പരിക്കേറ്റത്. കൊച്ചിയില്‍ നിന്നും സഞ്ചാരികളുമായി എത്തിയതായിരുന്നു ജംഷീര്‍. റിസോര്‍ട്ടിലെ പാര്‍ക്കിംഗ് ഏരിയയില്‍ വെച്ച് മറ്റൊരു ടാക്‌സി ഡ്രൈവറായ വിചിനുമായി ചേര്‍ന്ന് മദ്യപിച്ചു.

മദ്യത്തിന്റെ അളവ് കുറഞ്ഞുപോയെന്ന് പറഞ്ഞ് വിചിന്‍ തര്‍ക്കത്തിലേര്‍പ്പെടുകയും, ഇത് കൈയാങ്കളിയില്‍ കലാശിക്കുകയുമായിരുന്നു. ഈ തര്‍ക്കത്തില്‍ വിചിന്റെ തലയ്ക്ക് പരിക്കേറ്റു. ഇതിന് പ്രതികാരം ചെയ്യാന്‍ വിചിന്‍ തന്റെ അളിയനായ ദീപക്കിനെയും സുഹൃത്തുക്കളെയും വിളിച്ചുവരുത്തുകയായിരുന്നു. സംഘം ചേര്‍ന്നെത്തിയ പ്രതികള്‍ ജംഷീറിനെ കുത്തിപ്പരിക്കേല്‍പ്പിക്കുകയും ടൂറിസ്റ്റ് കാര്‍ അടിച്ചുതകര്‍ക്കുകയും ചെയ്തു.