ജാപ്പനീസ് മുന്‍ പ്രധാനമന്ത്രി തൊമീച്ചി മൂറ്യാമ അന്തരിച്ചു

ടോക്കിയോ: ജാപ്പനീസ് മുന്‍ പ്രധാനമന്ത്രി തൊമീച്ചി മൂറ്യാമ അന്തരിച്ചു. രണ്ടാം ലോകമഹായുദ്ധത്തില്‍ ക്ഷമാപണം നടത്തിയതിന് പ്രശസ്തനായ വ്യക്തിയാണ് മൂറ്യാമ. 101 വയസായിരുന്നു. വാര്‍ദ്ധക്യസഹജമായ അസുഖങ്ങളെ തുടര്‍ന്നാണ് അന്ത്യം.

1994 മുതല്‍ 1996 വരെ ജപ്പാന്റെ പ്രധാനമന്ത്രിയായിരുന്നു തൊമീച്ചി മുറ്യാമ. 1995ല്‍, രണ്ടാം ലോകമഹായുദ്ധത്തിലെ ആക്രമണത്തിന് ഔദ്യോഗികമായി ക്ഷമാപണം നടത്തിയ ജപ്പാന്റെ ആദ്യ പ്രധാനമന്ത്രിയായി അദ്ദേഹം മാറി.1995 ആഗസ്റ്റിലെ ഒരു സുപ്രധാന പ്രസ്താവനയില്‍, 'ജപ്പാന്‍, കൊളോണിയല്‍ ഭരണത്തിലൂടെയും ആക്രമണത്തിലൂടെയും പല രാജ്യങ്ങളിലെയും ജനങ്ങള്‍ക്ക്, പ്രത്യേകിച്ച് ഏഷ്യന്‍ രാജ്യങ്ങളിലെ ജനങ്ങള്‍ക്ക് വലിയ നാശനഷ്ടങ്ങളും കഷ്ടപ്പാടുകളും വരുത്തിവച്ചു. ഭാവിയില്‍ ഇത്തരമൊരു തെറ്റ് സംഭവിക്കാതിരിക്കട്ടെ. ചരിത്രത്തിലെ ഈ നിഷേധിക്കാനാവാത്ത വസ്തുതകളെ ഞാന്‍ താഴ്മയോടെ അംഗീകരിക്കുകയും എന്റെ അഗാധമായ പശ്ചാത്താപം ഇവിടെ വീണ്ടും പ്രകടിപ്പിക്കുകയും എന്റെ ഹൃദയംഗമമായ ക്ഷമാപണം നടത്തുകയും ചെയ്യുന്നു.' എന്ന് മുറ്യാമ പറഞ്ഞു.

2015ല്‍ പബ്ലിക് ബ്രോഡ്കാസ്റ്ററായ എന്‍എച്ച്‌കെയ്ക്ക് നല്‍കിയ അഭിമുഖത്തില്‍ അദ്ദേഹം സൈന്യത്തെ 'ഭയാനകമായ ഒന്നെന്നാണ് വിശേഷിപ്പിച്ചത്. 'കലാപമോ തര്‍ക്കമോ എങ്ങനെ പൂര്‍ണ്ണമായും വിലക്കപ്പെട്ടിരുന്നു' എന്നും അദ്ദേഹം കൂട്ടിചേര്‍ത്തു.