അനിശ്ചിതത്വത്തിന് വിരാമം; സീറ്റ് വിഭജന കരാറില്‍ ഒപ്പുവയ്ക്കാനൊരുങ്ങി ഡിഎംകെയും കോണ്‍ഗ്രസും

ചെന്നൈ: ദിവസങ്ങളോളം നീണ്ടുനിന്ന അനിശ്ചിതത്വത്തിന് വിരാമമിട്ട്, ഭരണകക്ഷിയായ ദ്രാവിഡ മുന്നേറ്റ കഴകവും (ഡിഎംകെ) ഇന്ത്യന്‍ നാഷണല്‍ കോണ്‍ഗ്രസും ഇന്ന് വൈകുന്നേരം സീറ്റ് വിഭജന കരാറില്‍ ഒപ്പുവയ്ക്കും. കോണ്‍ഗ്രസിന് 28 അല്ലെങ്കില്‍ 29 നിയമസഭാ സീറ്റുകള്‍ ലഭിക്കാന്‍ സാധ്യതയുണ്ട്. മുതിര്‍ന്ന കോണ്‍ഗ്രസ് നേതാവ് പി ചിദംബരം ഡിഎംകെ പ്രസിഡന്റും മുഖ്യമന്ത്രിയുമായ എം കെ സ്റ്റാലിനുമായി നേരിട്ട് ചര്‍ച്ച നടത്തിയതിന് തൊട്ടുപിന്നാലെയാണ് തീരുമാനം.

മിനിമം ഒത്തുതീര്‍പ്പ് ഫോര്‍മുലയായി കുറഞ്ഞത് 30 സീറ്റുകളും വേണമെന്നായിരുന്നു കോണ്‍ഗ്രസിന്റെ ആവശ്യം. കൂടുതല്‍ സീറ്റുകളും അധികാര വിഹിതവും നേരത്തെ ആവശ്യപ്പെട്ടവരില്‍ കോണ്‍ഗ്രസ് എംപി മാണിക്കം ടാഗോറും ഉള്‍പ്പെടുന്നു.

എന്നിരുന്നാലും വ്യക്തികള്‍ക്കിടയില്‍ വ്യത്യാസങ്ങള്‍ ഉണ്ടാകാമെന്നും നേതൃത്വം തീരുമാനിക്കുമ്പോള്‍, ഞങ്ങള്‍ അത് അച്ചടക്കത്തോടെ സ്വീകരിക്കുമെന്നും നേതാക്കള്‍ പറഞ്ഞു.