എലപ്പുള്ളി ബ്രൂവറി: ഡിജിറ്റല്‍ സര്‍വ്വേക്ക് സ്ഥലം വൃത്തിയാക്കാന്‍ ശ്രമം; പ്രതിഷേധം

പാലക്കാട്: ഡിജിറ്റല്‍ സര്‍വേ നടപടികള്‍ക്കായി എലപ്പുള്ളിയിലെ ബ്രൂവറി പദ്ധതി പ്രദേശം വൃത്തിയാക്കാന്‍ ഒയാസിസ് കമ്പനി നടപടി ആരംഭിച്ചു. എന്നാല്‍ നിര്‍മ്മാണ പ്രവര്‍ത്തനങ്ങള്‍ക്ക് തുടക്കമിടുകയാണെന്ന് ആരോപിച്ച് നിരവധി പേര്‍ സ്ഥലത്തെത്തി പ്രതിഷേധിച്ചു. നിലവില്‍ ഒരു നിര്‍മ്മാണ പ്രവര്‍ത്തനവും നടത്തുന്നില്ലെന്ന് ഒയാസിസ് കമ്പനി പ്രതിനിധി ഗോപീകൃഷ്ണന്‍ പ്രതിഷേധക്കാരോട് പറഞ്ഞു. സ്ഥലം കാട് പിടിച്ച് കടക്കുന്നുവെന്ന് പലരും പരാതി പറഞ്ഞിരുന്നുവെന്നും വൃത്തിയാക്കാന്‍ വരുന്ന കാര്യം വില്ലേജ് ഓഫീസറെയും പോലിസിനെയും അറിയിച്ചിരുന്നുവെന്നും ഗോപീകൃഷ്ണന്‍ കൂട്ടിച്ചേര്‍ത്തു.

എലപ്പുള്ളി പഞ്ചായത്തിലെ ആറാം വാര്‍ഡിലുള്ള മണ്ണുക്കാട് പ്രദേശത്താണ് മധ്യപ്രദേശിലെ മദ്യ നിര്‍മ്മാണ കമ്പനിയായ ഒയാസിസ് കൊമേഴ്‌സ്യല്‍ പ്രൈവറ്റ് ലിമിറ്റഡിന് ബ്രൂവറി പ്ലാന്റ് നിര്‍മ്മിക്കുന്നതിന് സംസ്ഥാന സര്‍ക്കാര്‍ പ്രാരംഭാനുമതി നല്‍കിയത്. 24 ഏക്കര്‍ സ്ഥലമാണ് കമ്പനി മദ്യനിര്‍മ്മാണ പ്ലാന്റ് നിര്‍മിക്കാനായി വാങ്ങിയത്. പ്ലാന്റ് എത്തുന്നതോടെ പ്രദേശത്തെ കാര്‍ഷിക മേഖല താറുമാറാകുമെന്നും കുടിവെള്ള പ്രശ്നം രൂക്ഷമാകുമെന്നും ചൂണ്ടിക്കാട്ടപ്പെടുന്നു.