ഗൂഗിള്‍ മാപ്പ് നോക്കി ഓടിച്ച ലോറി മരങ്ങള്‍ക്കിടയില്‍ കുടുങ്ങി

കോട്ടയ്ക്കല്‍: ഗൂഗിള്‍മാപ്പ് നോക്കി ഓടിച്ച കണ്ടെയ്നര്‍ലോറി മരങ്ങള്‍ക്കിടയില്‍ കുടുങ്ങി. മലപ്പുറം പുത്തൂര്‍ ചെനക്കല്‍ ബൈപ്പാസിലെ മരങ്ങള്‍ക്കിടയിലാണ് ഇന്ന് വൈകീട്ട് ലോറി കുടുങ്ങിയത്. ഇതോടെ ഗതാഗതം പൂര്‍ണമായും തടസപ്പെട്ടു. മഞ്ചേരിയില്‍ നിന്നും തൃശൂരിലേക്ക് പോകുന്ന കണ്ടെയ്നര്‍ ലോറിയാണ് ചങ്കുവെട്ടി ഭാഗത്തേക്ക് പോകുന്നതിന് പകരം പുത്തൂര്‍-ചെനക്കല്‍ ബൈപാസിലേക്ക് കയറിയത്. ലോറി അല്‍പദൂരം മുന്നോട്ട് പോയെങ്കിലും ബൈപ്പാസില്‍ കുടുങ്ങുകയായിരുന്നു. കോട്ടയ്ക്കല്‍ പോലിസും നാട്ടുകാരും ചേര്‍ന്ന് ഏറെനേരം പണിപ്പെട്ടാണ് ലോറിക്ക് മുകളിലേക്ക് പൊട്ടിവീണ മരച്ചില്ലകള്‍ വെട്ടിമാറ്റിയത്.