'മാനിഷാദ'; ഗാന്ധി ജയന്തി ദിനത്തില്‍ ഫലസ്തീന്‍ ഐക്യദാര്‍ഢ്യ സദസുകള്‍ കോണ്‍ഗ്രസ് സംഘടിപ്പിക്കും

തിരുവനന്തപുരം: ഫലസ്തീന്‍ ഐക്യദാര്‍ഢ്യ സദസുകള്‍ സംഘടിപ്പിക്കാനൊരുങ്ങി കോണ്‍ഗ്രസ്. ഗാന്ധി ജയന്തി ദിനത്തില്‍ സംഘടിപ്പിക്കാനാണ് കെപിസിസിയുടെ തീരുമാനം. കോണ്‍ഗ്രസ് മണ്ഡലം കമ്മിറ്റികളാണ് പരിപാടികള്‍ നടത്തുക. 'മാനിഷാദ' എന്ന പേരിലാണ് ഫലസ്തീന്‍ ഐക്യദാര്‍ഢ്യ സദസുകള്‍ സംഘടിപ്പിക്കുക.

ഫലസ്തീന്‍ വിഷയത്തില്‍ ഇന്ത്യ മൗനം പാലിക്കുന്നത് മനുഷ്യത്വത്തിന്റെയും ധാര്‍മികതയുടെയും ഉത്തരവാദിത്തത്തില്‍ നിന്ന് ഒഴിഞ്ഞുമാറുന്നതിന് തുല്യമാണെന്ന് സോണിയാ ഗാന്ധി പറഞ്ഞിരുന്നു. ഫലസ്തീന്‍ ജനതയ്ക്കുമേല്‍ ഇസ്രായേല്‍ വിനാശം അഴിച്ചുവിടുമ്പോള്‍ ഇന്ത്യ മൗനം പാലിക്കുന്നത് ലജ്ജാകരമാണെന്ന് പ്രിയങ്കാഗാന്ധിയും പ്രതികരിച്ചിരുന്നു.

'മനുഷ്യത്വം അവര്‍ക്ക് ഒന്നുമല്ല. സത്യത്തെ അഭിമുഖീകരിക്കാനുളള കഴിവില്ലായ്മയാണ് തെളിയിക്കുന്നത്. സങ്കല്‍പ്പിക്കാന്‍ സാധിക്കാത്ത ബുദ്ധിമുട്ടുകളാണ് ഫലസ്തീനികള്‍ അനുഭവിക്കുന്നത്. എന്നിട്ടും അവരുടെ മനസ് അചഞ്ചലമായി നില്‍ക്കുന്നു'. ഇസ്രായേലിന്റേത് ചോര മരവിപ്പിക്കുന്ന കൊടുംക്രൂരതയാണെന്നും എന്നും പ്രിയങ്കാഗാന്ധി നേരത്തെ പറഞ്ഞിരുന്നു.