ബംഗാളി നടന്‍ രാഹുല്‍ അരുണോദയ് ബാനര്‍ജി കടലില്‍ മുങ്ങിമരിച്ചു

കൊല്‍കത്ത: പ്രശസ്ത ബംഗാളി നടന്‍ രാഹുല്‍ അരുണോദയ് ബാനര്‍ജി(43)അന്തരിച്ചു. ഒഡീഷയിലെ താല്‍സാരി ബീച്ചില്‍ കടലില്‍ മുങ്ങിമരിക്കുകയായിരുന്നു അദ്ദേഹം. മാര്‍ച്ച് 29നാണ് സംഭവം. നടി പ്രിയങ്ക സര്‍ക്കാറാണ് രാഹുലിന്റെ ഭാര്യ. സഹോജ് സഹോജാണ് മകന്‍. 2017ല്‍ ഇവര്‍ വേര്‍പിരിഞ്ഞെങ്കിലും 2023ല്‍ വീണ്ടും ഒന്നിച്ചു. ഈ ദുഷ്‌കരമായ സമയത്ത് കുടുംബത്തിന്റെ സ്വകാര്യതയെ മാനിക്കണമെന്ന് പ്രിയങ്കയും മറ്റ് സഹപ്രവര്‍ത്തകരും അഭ്യര്‍ത്ഥിച്ചു.

2008ല്‍ പുറത്തിറങ്ങിയ 'ചിരോദിനി തുമി ജെ അമര്‍' എന്ന സൂപ്പര്‍ഹിറ്റ് ചിത്രത്തിലൂടെയാണ് രാഹുല്‍ ചലച്ചിത്രരംഗത്ത് ശ്രദ്ധിക്കപ്പെട്ടത്. പിന്നീട് തുമി ആസ്‌ബേ ബോലേ, ടേക്ക് വണ്‍, സുള്‍ഫിക്കര്‍, ബ്യോംകേഷ് ഗോത്രോ തുടങ്ങി നിരവധി ശ്രദ്ധേയമായ സിനിമകളില്‍ അദ്ദേഹം അഭിനയിച്ചു. സംവിധായകന്‍ ശ്രീജിത്ത് മുഖര്‍ജിക്കൊപ്പം ജാതീശ്വര്‍, ബ്യോംകേഷ് ദുര്‍ഗോ രഹസ്യ തുടങ്ങിയ ചിത്രങ്ങളിലും പ്രവര്‍ത്തിച്ചിട്ടുണ്ട്.

രാഹുലിന്റെ മരണവാര്‍ത്ത അറിഞ്ഞ് ബംഗാളിലെ പ്രശസ്ത താരങ്ങളായ ജീത്, ദേവ്, ശുഭശ്രീ ഗാംഗുലി, പരംബ്രത ചാറ്റര്‍ജി തുടങ്ങിയ പ്രമുഖ താരങ്ങള്‍ സോഷ്യല്‍ മീഡിയയിലൂടെ അനുശോചനം രേഖപ്പെടുത്തി. ജീവിതം എത്രമാത്രം അനിശ്ചിതത്വങ്ങള്‍ നിറഞ്ഞതാണെന്ന് ഈ മരണം ഓര്‍മ്മിപ്പിക്കുന്നുവെന്ന് നടന്‍ ജീത് കുറിച്ചു. 'ഇന്ദുബാല ഭാതര്‍ ഹോട്ടല്‍' എന്ന പരമ്പരയില്‍ രാഹുലിനൊപ്പം അഭിനയിച്ച ശുഭശ്രീ ഗാംഗുലിയും അദ്ദേഹത്തിന്റെ വിയോഗത്തില്‍ അതിയായ ദുഃഖം പ്രകടിപ്പിച്ചു. കലാരംഗത്ത് സ്വന്തമായൊരു വ്യക്തിമുദ്ര പതിപ്പിച്ച അദ്ദേഹം തീര്‍ത്തും ഒരു വേറിട്ട വ്യക്തിത്വമായിരുന്നുവെന്ന് ഗായിക സഹാന ബാജ്‌പേയി അനുസ്മരിച്ചു.