'അടൂര്‍ മഹാന്‍' ; വിവാദ പരാമര്‍ശത്തില്‍ അടൂരിനെ പിന്തുണച്ച് മന്ത്രി വി എന്‍ വാസവന്‍

തിരുവനന്തപുരം: അടൂരിനെ പിന്തുണച്ച് മന്ത്രി വി എന്‍ വാസവന്‍. കേരള ചലചിത്ര വികസന കോര്‍പറേഷന്റെ ചെലവില്‍ സിനിമകള്‍ നിര്‍മിക്കുന്നതില്‍ പ്രശസ്ത സംവിധായകന്‍ അടൂര്‍ ഗോപാലകൃഷ്ണന്‍ നടത്തിയ പരാമര്‍ശം വിവാദമായതോടെയാണ് നീക്കം. അടൂര്‍ പറഞ്ഞതില്‍ ദുരുദ്ദേശമുണ്ടെന്ന് കരുതുന്നില്ല, അദ്ദേഹം പറഞ്ഞത് വളച്ചൊടിച്ച് വിവാദമാക്കുകയാണ്. സര്‍ക്കാര്‍ സത്രീകള്‍ക്കും എസ്എസ്ടി വിഭാഗങ്ങള്‍ക്കൊപ്പമാണെന്നും മന്ത്രി പറഞ്ഞു. അടൂര്‍ മഹാനാണെന്നും മന്ത്രി പറഞ്ഞു.

സിനിമാ കോണ്‍ക്ലേവിന്റെ സമാപനവേദിയിലാണ് അടൂര്‍ വിവാദ പരാമര്‍ശങ്ങള്‍ നടത്തിയത്. പട്ടികജാതി വിഭാഗത്തില്‍ നിന്ന് സിനിമയെടുക്കാന്‍ വരുന്നവര്‍ക്ക് ആദ്യം പരിശീലനമാണ് നല്‍കണമെന്ന് അടൂര്‍ പറഞ്ഞു. മൂന്നുമാസത്തെ പരിശീലനം ശേഷം വേണം പണം നല്‍കാന്‍. സൂപ്പര്‍സ്റ്റാറുകളെ വെച്ച് പടമെടുക്കുന്നതിന് സര്‍ക്കാര്‍ സഹായം നല്‍കരുത്. ചലച്ചിത്ര വികസന കോര്‍പ്പറേഷന്‍ വെറുതേ പണം മുടക്കരുത്. ഒന്നരക്കോടി രൂപ നല്‍കുന്നത് വളരെ കൂടുതലാണ്. പലരും ചെയ്തത് നിലവാരമില്ലാത്ത സിനിമകളാണ്. സ്ത്രീകളായത് കൊണ്ട് മാത്രം അവസരം കൊടുക്കാന്‍ പാടില്ല.

കെ ആര്‍ നാരായണന്‍ ഫിലിം ഇന്‍സ്റ്റിറ്റ്യൂട്ടില്‍ നടന്ന സമരം മോശം സമരമായിരുന്നു. അച്ചടക്കം കൊണ്ടുവരാന്‍ ശ്രമിച്ചതിനാണ് സമരം നടത്തിയത്. ആ സ്ഥാപനത്തെ ഇപ്പോള്‍ ഒന്നുമല്ലാതാക്കി. ടെലിവിഷന്‍ നശിച്ച അവസ്ഥയിലാണ്. ഒരു നല്ല പരിപാടി പോലുമില്ലെന്നും അദ്ദേഹം പറഞ്ഞു. ഇതിനെതിരേ നിരവധി പേര്‍ രംഗത്തുവരികയും ഇക്കാലത്തും ജാതി പറയുന്നത് ദുഷ്ടലാക്കാണെന്നും അവര്‍ ആരോപിക്കുകയും ചെയ്തു. വിമര്‍ശനമുന്നയിച്ചവരില്‍ മിക്കവരും കലാ-സാംസ്‌കാരിക മേഖലയിലുള്ളവരാണ്.