പിറന്നാള്‍ ആഘോഷത്തിനു വച്ച പണം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കി പാമ്പുംമേക്കാട്ട് മന കാരണവര്‍

മാള: ലോകം മുഴുവന്‍ മഹാമാരിയില്‍ നിന്നും അതിജീവനത്തിനായി പൊരുതുമ്പോള്‍ പാമ്പുംമേക്കാട്ട് കാരണവര്‍ക്ക് മാത്രം എന്ത് ആഘോഷമെന്നാണ് തിരുമേനിയുടെ ചോദ്യം. വടമ പാമ്പുംമേക്കാട്ട് മന കാരണവര്‍ പി എസ് ശ്രീധരന്‍ നമ്പൂതിരിപ്പാടാണ് പിറന്നാള്‍ ആഘോഷം ഒഴിവാക്കി ആ തുക മുഖ്യമന്ത്രിയുടെ ദുരിതാശ്വാസനിധിയിലേക്ക് നല്‍കിയത്. ഒരു ലക്ഷം രൂപയാണ് സംഭാവന നല്‍കിയത്. ഏപ്രില്‍ പതിനൊന്നിനായിരുന്നു പിറന്നാള്‍. പിറന്നാള്‍ ദിനത്തില്‍ ആയിരം കുടുംബങ്ങള്‍ക്ക് പലവ്യഞ്ജന കിറ്റും നല്‍കിയിരുന്നു. വി ആര്‍ സുനില്‍കുമാര്‍ എം എല്‍ എ നേരിട്ട് മനയിലെത്തി ശ്രീധരന്‍ നമ്പൂതിരിപ്പാടില്‍ നിന്നും തുക സ്വീകരിച്ചു. മാള ഗ്രാമപഞ്ചായത്ത് പ്രസിഡന്റ് ശോഭാ സുഭാഷ്, വാര്‍ഡ് മെമ്പര്‍ എന്നിവര്‍ സന്നിഹിതരായിരുന്നു.