സ്വകാര്യ ട്യൂഷന്‍: മൂന്ന് അധ്യാപകര്‍ക്ക് കൂടി സസ്പെന്‍ഷന്‍

തിരുവനന്തപുരം: സ്വകാര്യ ട്യൂഷന്‍ എടുത്തതിന്റെ പേരില്‍ തിരുവനന്തപുരം ജില്ലയിലെ മൂന്ന് ഹയര്‍സെക്കന്ററി അധ്യാപകര്‍ക്ക് സസ്പെന്‍ഷന്‍. ചിറയിന്‍കീഴ് പിഎന്‍എംജിഎച്ച്എസ് സ്‌കൂളിലെ അധ്യാപകനായ രാജേഷ്, പൂതക്കുളം ഗവഎച്ച്എസ്എസിലെ അധ്യാപകന്‍ സുനേഷ്, വിളവൂര്‍കാല്‍ ഗവ.ഹയര്‍ സെക്കന്ററി സ്‌കൂളിലെ അധ്യാപകന്‍ ഡി അനില്‍ എന്നിവരെയാണ് സസ്പെന്‍ഡ് ചെയ്തത്. മൂന്നുപേരും കെമിസ്ട്രി അധ്യാപകരാണ്.

സ്വകാര്യ ട്യൂഷനെടുക്കുന്നത് കേരള ഗവണ്‍മെന്റ് സര്‍വന്റ്സ് കോണ്‍ടാക്ട് റൂള്‍ 48 പ്രകാരം ഗുരുതരമായ അച്ചടക്ക ലംഘനമാണ്. പൊതുവിദ്യാഭ്യാസ വകുപ്പിന്റേതാണ് നടപടി. കഴിഞ്ഞ ദിവസം നെയ്യാറ്റിൻകരയിലെ ഒരു അധ്യാപകനെതിരേ നടപടി എടുത്തിരുന്നു.