ഉദ്ഘാടനത്തിനു പിന്നാലെ തൂക്കുപാലത്തിന്റെ കൈവരികള്‍ പൊട്ടിവീണു

പാലക്കാട്: തൃപ്പാളൂരില്‍ ഇന്നലെ ഉദ്ഘാടനം ചെയ്ത തൂക്കുപാലത്തിന്റെ കൈവരികള്‍ പൊട്ടിവീണു. ഗായത്രിപ്പുഴക്ക് കുറുകെ തൃപ്പാളൂര്‍ ശിവക്ഷേത്രത്തിലേക്ക് നിര്‍മ്മിച്ച തൂക്കുപാലത്തിന്റെ കൈവരി കമ്പികളാണ് പൊട്ടിവീണത്. അഞ്ചുകോടി രൂപ ചെലവഴിച്ചാണ് തൂക്കുപാലവും, ഓപണ്‍ സ്റ്റേജ്, ടോയ്ലറ്റ് ബ്ലോക്ക്, ലൈറ്റുകള്‍, കുട്ടികള്‍ക്ക് കളിക്കാനുള്ള സ്ഥലം ഉള്‍പ്പെടെയുള്ള അനുബന്ധ സൗകര്യങ്ങള്‍ ഒരുക്കിയത്.

കെഡി പ്രസന്നന്‍ എംഎല്‍എയുടെ നിര്‍ദേശപ്രകാരം ബജറ്റ് വിഹിതമായ തുക ഉപയോഗിച്ചാണ് പാലം നിര്‍മ്മിച്ചിരുന്നത്. ഉദ്ഘാടനത്തിനിടയില്‍ തന്നെ കൈവരികള്‍ പൊട്ടിവീണിരുന്നു. ഇത് ചില ആളുകള്‍ ശ്രദ്ധയില്‍പ്പെടുത്തിയിരുന്നു. പാലത്തിന്റെ കൈവരികള്‍ തകര്‍ന്നതോടെ നാട്ടുകാര്‍ രംഗത്തെത്തി. പ്രശ്‌നം ഉടന്‍ തന്നെ പരിഹരിക്കാമെന്നാണ് ഉദ്യോഗസ്ഥര്‍ നാട്ടുകാരോട് പറഞ്ഞിരിക്കുന്നത്.