മഞ്ചേരിയില്‍ ഇരുനില കെട്ടിടത്തില്‍ മനുഷ്യ അസ്ഥിക്കൂടം കണ്ടെത്തി

മഞ്ചേരി: ഇരുനില കെട്ടിടത്തിന്റെ ഓപ്പണ്‍ ടെറസില്‍ മനുഷ്യ അസ്ഥിക്കൂടം കണ്ടെത്തി. ചെരണിയിലെ പ്ലൈവുഡ് റോഡില്‍ സ്ഥിതി ചെയ്യുന്ന കെട്ടിടത്തിന്റെ മുകളിലാണ് അസ്ഥിക്കൂടം കണ്ടെത്തിയത്. പല ഭാഗങ്ങളായി കിടക്കുന്ന അസ്ഥിക്കൂടത്തിന് കുറച്ച് പഴക്കമുള്ളതായി പ്രാഥമിക അന്വേഷണത്തില്‍ പോലിസ് കണ്ടെത്തി. ടെറസിന് മുകളില്‍ പഴയ സാധനങ്ങള്‍ കൂമ്പാരമായി വലിച്ചെറിഞ്ഞ് കിടക്കുന്നതിനിടയിലാണ് അസ്ഥിക്കൂടത്തിന്റെ ഭാഗങ്ങള്‍ കിടക്കുന്നത്.

കെട്ടിടത്തില്‍ തമിഴ്നാട്ടില്‍ നിന്നുള്ള അതിഥി തൊഴിലാളികള്‍ താമസിച്ചു വരികയായിരുന്നു. മുമ്പ് അതേ സ്ഥലത്ത് ഒരു തമിഴ്‌നാട് കുടുംബം താമസിച്ചിരുന്നുവെന്ന് പോലിസ് അറിയിച്ചു. കുടുംബത്തെ കുറിച്ചും അന്വേഷണം തുടരുകയാണ്. അസ്ഥിക്കൂടം ആരുടേതാണെന്ന് വ്യക്തമാക്കാനായിട്ടില്ല. ഫോറന്‍സിക് വിഭാഗം ബുധനാഴ്ച സ്ഥലത്ത് പരിശോധന നടത്തും. പോലിസ് കൂടുതല്‍ അന്വേഷണം ആരംഭിച്ചു.