ചാലിയാറില്‍ നീര്‍നായ ആക്രമണം; കുളിക്കാനിറങ്ങിയ രണ്ടുപേര്‍ക്ക് കടിയേറ്റു

മലപ്പുറം: ചാലിയാറില്‍ കൂളിമാട് പാലത്തിന് സമീപം കുളിക്കടവില്‍ നീര്‍നായ ആക്രമണം. കുളിക്കാനിറങ്ങിയ രണ്ട് പേരെ നീര്‍നായ കടിച്ചു. മപ്രം ബുഖാരിയ ഇന്റഗ്രേറ്റഡ് ഖുര്‍ആന്‍ കോളജിന് സമീപമുള്ള കടവിലാണ് സംഭവം. അങ്ങാടിയില്‍ ഉണ്ണിമോയിനു നേരെയാണ് നീര്‍നായയുടെ ആക്രമണമുണ്ടായത്. ഒപ്പം ഒരു വിദ്യാര്‍ത്ഥിനിക്കും കടിയേറ്റിട്ടുണ്ട്. ഇരുവരെയും കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു വാക്‌സീന്‍ നല്‍കി. ഒറ്റയാന്‍ നീര്‍നായയാണ് ഇവരെ ആക്രമിച്ചത്. ഒരാഴ്ച മുമ്പ് എളമരം കടവ് മാവൂര്‍ ഭാഗത്ത് നീര്‍നായ ആക്രമണം ഉണ്ടായിരുന്നു.

ചാലിയാറില്‍ നീര്‍നായകള്‍ വിഹരിക്കുകയാണ് ഇപ്പോള്‍. ചാലിയാര്‍ പുഴയുടെ ഇരു കരയിലുള്ളവര്‍ക്ക് പുഴയില്‍ ഇറങ്ങാന്‍ ഇപ്പോള്‍ നീര്‍നായ കാരണം ഭയമാണ്. ഒരു വര്‍ഷം മുമ്പ് കുളിമാട് പാലത്തിനടുത്ത കടവില്‍ നീര്‍നായ ആക്രമണത്തില്‍ വിദ്യാര്‍ത്ഥികള്‍ക്ക് പരിക്കേറ്റിരുന്നു.

വെള്ളത്തിനടിയിലൂടെയുള്ള നീര്‍നായ ആക്രമണത്തില്‍ നിന്ന് രക്ഷപ്പെടാന്‍ പ്രയാസമാണെന്നാണ് നാട്ടുകാര്‍ പറയുന്നത്.